Asturies lidera con Cantabria l’aumentu del paru en xineru

El fin de la campaña navidiega devolvió la tendencia de crecimientu del paru a Asturies. El frenu d’avientu, con una mengua de 920 persones depués de cuatro meses siguíos d’ascensu, nun tuvo continuidá en xineru, cuando’l númberu de desemplegaos medró en 3.010, liderando’l país xunto a Cantabria esti aumentu.

Asturies rexistó un 4,30 por cientu, por un 5,77 de la comunidá vecina, siendo la media estatal del 2,85 por cientu. Aragón, con un 4,28, ye la siguiente d’una lista que zarren Melilla y Illes Balears, onde desciende’l paru un 3,06 y un 0,44 por cientu, de manera respeutiva.

Ye de destacar que’ocho de cada diez nuevos desemplegaos n’Asturies correspondieron al sector servicios. Sicasí, l’aumentu diose en tolos grupos d’edá, tanto n’homes como en muyeres, y en tolos sectores.

El númberu total de paraos que tien anguaño’l país ye de 72.967 persones. En comparanza col mesmu periodu del añu pasáu, Asturies cuenta con 2.814 menos, lo que supón una mengua del 3,71 por cientu, superior a la media estatal, del 0,97 por cientu, y tercer meyor datu del Estáu, acumulando 76 meses de descensu.

Les meyores cifres preséntales Castilla y Lleón, con un 4,91 por cientu, comunidá autonóma a la que-y sigue Galicia, con un 4,03. Melilla rexistra’l peor datu, con un aumentu del 11,41 por cientu, xunto con Castilla-La Mancha, con un 3,58 por cientu, y Illes Balears, con un 1,06 por cientu.

5.020 afiliaos menos a la Seguridá Social con respeuto a avientu

En cuanto a l’afiliación a la Seguridá Social, creció nos doce meses últimos en 3.388 afiliados (0,94 por cientu) hasta asitiase en 362.653 persones al finar el mes de xineru. En rellación al mes anterior, el númberu de cotizantes baxó un 1,37 por cientu, lo que supón 5.020 afiliados menos.