El Reinu Xuníu fai realidá'l Brexit

A les 00.00 hores del sábadu 1 de febreru, les 23 del vienres en Londres, va dexar de ser miembru de la Xunión Europea (XE).

Trés años y mediu depués del referéndum sobre la salida del Reinu Xuníu del proyeutu común européu, procesu conocíu de manera popular como 'Brexit', nel que ganó'l 'Sí' con un 51,89 por cientu de los votos, l'estáu formáu por Inglaterra, Cymru, Irlanda del Norte y Alba executa'l pasu a pesar del refugu al mesmu nos dos territorios últimos. Llega tres una llarga negociación cola XE y depués de trés prórrogues sobre la fecha definitiva.

L'amplia colonia asturiana en territorios británicos, cifrada en cerca de 3.000 persones, nun va tener problemes pa siguir trabayando al poder acceder a un permisu de residencia, anque sí caltién duldes sobre les consecuencies económiques del Brexit pal Reinu Xuníu. Los turistes tampoco nun van atopar problemes pa viaxar a Gran Bretaña y a Irlanda del Norte, yá que nun va ser necesario visáu.