El 'Urogallo' 2019 de Llingua Asturiana ye pa González Riaño

Xeitu, la Banda de Gaites de Castrillón o'l pastor Nel Cañedo son otros de los premiaos nes estayes diferentes d'esti reconocimientu qu'entrega'l Centro Asturiano de Madrid.

La selmana pasada aconceyó la Xunta Direutiva d'esti coleutivu d'emigrantes pa decidir los ganadores de los diferente gallardones qu'entrega tolos años nel marcu de la Feria Internacional de Muestres d'Asturies (FIDMA), que se desendolca en Xixón n'agostu. Éstos divívidense nes 'Manzanas de Oro' y los 'Urogallos', ente los que destaca una categoría de 'Llingua Asturiana'.

El merecedor d'esti reconocimientu esti añu ye Xosé Antón González Riaño, presidente de l'Academia de la Llingua Asturiana, qu'asocede nel llistáu de premiaos al monologuista Carlos Alba 'Cellero'. El restu de gallardonaos son Luis Suárez ('Artesanía'), Xeitu ('Baile'), Cristina Sánchez Sánchez ('Tonada'), Coro Liceo de Navia ('Masa Coral'), Banda de Gaites de Castrillón ('Gaita'), El Llar de Viri ('Gastronomía), Nel Cañedo ('Personaje Popular'), Biodevas ('Defensa de la Naturaleza'), Festival de Bandas de Gaitas Ciudad de Cangas de Onís ('Festejos Populares') y Toña Is ('Deportes'), mentes que los 'Urogallos' especiales llévenlos Nando Agüeros, Javier Barón Thaidigmann y Fernando Fueyo, con dos especiales con mención honorífica pa l'Asociación de Familias de Niños con Cáncer del Principado de Asturias Galbán y la Brigada Central de Salvamento Minero.

Mentes, la 'Manzana de Oro', el premiu más destacáu del Centro Asturiano de Madrid, va recibila José Luis Casas Villanueva, l'ex presidente del país Javier Fernández, Javier de Montini, Joaquín Pixán y Amelia Valcárcel. Miguel Fuentes merez el reconocimientu de 'Asturiano Adoptivo en Madrid' y José Vicente Guzmán, el de 'Socio del Año'.