Carlos Alba 'Cellero' recoyó'l so 'Urogallo' de Llingua Asturiana

|
Carlos Alba 'Cellero' recibe 'Urogallo'

El Centro Asturiano de Madrid entregó na FIDMA los sos gallardones del 2018, que reconocieron a Cartonajes Vir, al FID'O, Rodrigo Cuevas o Isaac Sierra, ente otros.

Carlos Alba 'Cellero' recoyó ayeri'l so 'Urogallo' na estaya de Llingua Asturiana. Foi nun actu nel salón d'actos del recintu Ferial Luis Adaro, qu'estos díes acueye la LXIII Feria Internacional de Muestres d'Asturies (FIDMA).

El monologuista, qu'asocede nel llistáu de premiaos a Xuan Xosé Sánchez Vicente, recordó na so intervención qu'una de les sos primeres actuaciones foi precisamente nel Centro Asturiano de Madrid y destacó que-y "presta muncho'l premiu sobre manera pola nómina de premiaos en Llingua, con xente de munchu nivel a nivel llingüísticu: académicos, esctitores, filólogos", citando ente ellos "a la primera, María Xosefa Canellada, que pa min foi importantísima". Tamién defendió l'asturianu oral y popular, agora que "l'idioma ta sintiéndose más en medios de comunicación, nel Parllamentu, nel mundu de la política...", pa que "cuando nos pongamos a falar nun sitiu mui formal, como la tele o la radio, falemos cola pronunciación y la entonación asturiana".

Otres estayes

Nel 2018 los premios n'otres estayes de los 'Urogallo', gallardón creáu pa reconocer a personalidaes relevantes de la cultura asturiana, foron Rodrigo Cuevas (personaxe popular), el Festival Intercéltico d'Occidente (fiestes), Isaac Sierra (tonada), el Grupu Folklóricu Trasgu (baille), la Banda de Gaitas Villa de Xixón (gaita), la Panadería Marín de Cangas (artesanía), el Coro Vetusta (corales), el Restaurante Casa Lobato (gastronomía), el Conceyu de Ribedeva (defensa de la ñatura) y la surfista Carmen López (deportes). Lleva l'especial Ana López Marín, y los especiales con mención específica, María del Carmen Martínez Rodríguez, Alfredo Menéndez Fernández y AFESA Salud Mental Asturias.

Mentes, el gallardón de 'Entidá Asturiana del Año' foi pa la empresa familiar Cartonajes Vir, de la que ye xerente Inaciu Iglesias.

 

Contador Estadistiques