L’osu perfadiosu de Vitu Pintado llega n’asturianu y gallego-asturiano

Víctor Raúl Pintado ‘Vitu’ ta acabante d’asoleyar una obra nueva de lliteratura infantil nes dos llingües minorizaes d’Asturies. Trátase de ‘Un osu perfadiosu’, ‘Un oso fastidioso’ en gallego-asturiano, editaes por Trabe, que cuenten con ilustraciones de Berto Álvarez Peña.

La obra sal a la venta na época na que precisamente trescurre l’aición de la historia, que protagonicen Xela y Lluques. Al so maestru presten-y enforma les mazcaraes d’iviernu y enseña a los sos escolinos estes tradiciones con tantu raigañu n’Asturies, nel que dellos personaxes antroxaos, ente ellos l’osu en munches d’elles, salen a pidir l’aguilandu.

La presentación d’esta obra na so versión n’asturianu va tener llugar el martes a les 19.30 hores nel salón d’actos del Centru de Servicios Universitarios, n’Avilés. Nella, amás de Vitu y Álvarez Peña, van participar la editoria Esther Prieto y Xosé Ramón Iglesias Cueva, secretariu de l’Academia de la Llingua Asturiana.