Xixón, Navia y A Caridá acueyen presentaciones de llibros n'asturianu y gallego-asturiano

|

'El centinela', 'Ritanes, ñerbates y otros cantos al pasáu' y 'Un oso fastidioso' son los títulos que van protagonizar los actos lliterarios.

El PSOE de Xixón entama'l firmáu por Henrique Facuriella na llibrería xixonesa La Buena Letra nuna 'Tarde de Letras Asturianas'. 'El centinela' (Saltadera) trátase del primer poemariu del autor de Blimea, que nel actu de güei, previstu pa les 20 hores, va tar acompañáu por Benigno Delmiro, caderalgu de Llingua y Lliteratura, y Arantzazu Oblanca, secretaria d'Educación y Cultura de l'Agrupación Municipal Socialista de Gijón (AMSG), que va encargase de moderar el mesmu.

Armando Vega va tar en Navia pa presentar el so poemariu ‘Ritanes, ñerbates y otros cantos al pasáu’ (Ediciones Trabe). L'eventu pa dar a conocer la edición de la obra ganadora del XII Premiu Nené Losada Rico, correspondiente al añu 2017, va ser a les 19 hores d'esta tarde nel Espacio Cultural El Liceo, cola presencia de Susana Alonso, entamadora del eventu, y l'acompañamientu musical del dúu Redness, formáu por Nati Nix y Hugo Martín.

Espublización infantil

El tercer eventu lliterariu de la xornada va tar dedicáu a les neñes y neños del occidente. Trátase de la versión en gallego-asturiano de la obra última de Víctor Raúl Pintado 'Vitu' con ilustraciones d'Alberto Álvarez Peña, 'Un oso fastidioso' (Ediciones Trabe), actu que va celebrase a les 20 hores nel Complexo Cultural As Quintas d'A Caridá.

Contador Estadistiques