Foro recupera l’escañu nel Congresu, que pierde Ciudadanos, y el PSOE torna a ganar n’Asturies

El PSOE gana les eleiciones estatales n’Asturies con un porcentaxe de votos asemeyáu al del mes d'abril y caltienen los sos 3 diputaos. Foro torna al Congresu gracies a la xuba de cinco puntos de la so coalición col PP, escañu que pierde Ciudadanos, mentes que Xuníes Podemos y VOX mantienen el suyu.

Col 98,54 por cientu de los votos escrutaos el PSOE algama’l 33,22 por cientu del total, lo qu’implica una xuba pequeña con respueto a la cita d’abril, cuando rexistró un 33,13 por cientu. PP-Foro y VOX son los que más xuben en sofitu, al sumar un 23,29 (17,90 el 28-A) y un 15,90 por cientu (11,49) de manera respeutiva, lo que permite a Isidro Martínez Oblanca tornar a Madrid.

Pierde’l so escaño Ignacio Prendes por mor de la cayida grande de Ciudadanos nel país, al pasar d’un 16,71 por cientu a un 6,64. Más País-EQUO, mentes, nun consigue’l sofitu qu’esperaba n’Asturies y queda nun curtiu 2,25 por cientu, y Xuníes Podemos baxa d'un 17,14 por cientu a un 15,96 por cientu, anque Sofía Castañón caltién la so acta de diputada.

Andecha Astur, únicu partíu asturianu que participaba en solitariu nestes eleiciones, caltienen los mesmos resultaos insuficientes, raspiando los 1.000 votos (0,16 por cientu).

Repítense resultaos al Senáu

Nun hai cambios mentes na representación asturiana nel Senáu. Col 44,97 por cientu de los votos escrutaos, el PSOE caltién los sos 3 escaños y el PP el de so.

Na semeya, Adriana Lastra, candidata del PSOE n'Asturies, exerce'l so derechu al votu n'Uviéu.