El III Premiu Nel Amaro de teatru yá tien finalistes

El 8 de payares van comenzar les representaciones del III Premiu y Festival Nel Amaro de Teatru Profesional en Llingua Asturiana o Gallego-asturiano, del que yá se conocen los cuatro finalistes. Repite Higiénico Papel, ganador l’añu pasáu, agora con ‘Una casa’, que va competir con Ververemos, El Callejón del Gato y Factoría Norte.

El Teatru Filarmónica d’Uviéu torna a acoyer la parte de festival del concursu, abierta al públicu, nel que’l xuráu pue valorar les obres finalistes tres ver la representación de les obres en direuto. Les funciones van celebrase tolos vienres de payares, a esceición del festivu día 1, Tolos Santos.

La primera en participar va ser, el día 8, Ververemos, que presenta ‘Muyeres inesperaes’. El 15 va ser el turnu de El Callejón del Gato, qu’acude con ‘Crecer’, mentes que’l 22 toca-y a Higiénico Papel Teatro, con ‘Una casa’, y el 29 a Factoría Norte, con ‘Les rellaciones peligroses’.

El Nel Amaro convócase cola mira de “consolidar, arriquecer y prestixar estes dos llingües nel ámbitu del arte dramático” y cuenta dende l’añu pasáu con una recompensa de 6.000 euros pal ganador. La entrega del gallardón va tener llugar nuna ceremonia xunto colos vencedores de les cinco estayes de los Premios Lliterarios 2019.

Na primer edición, Carlos Alba ‘Cellero’ llevó’l concursu gracies a ‘Llázaro de Tormes’, mentes qu’Higiénico Papel fixo lo propio l’añu pasáu con ‘Hansel y Gretel’. Esta compañía ye la única en tar presente en toles finales del premiu, yá qu’l primer añu participó con ‘Nunca nun se sabe’.

Na semeya, una escena de 'Hansel y Gretel'.