Una ruta guiada percuerre llugares claves na Revolución d'Ochobre

El guía oficial Denis Soria va poner les esplicaciones n'asturianu d'esta visita.

Ser Asturianu entama dos salíes nueves per Uviéu en llingua asturiana. Coincidiendo col 85 aniversariu de la Revolución d'Ochobre del 34 ufre nesta ocasión una visita guiada per llugares claves d'esti fechu históricu, "l’acontecimientu más importante que vivió Uviéu en tol sieglu XX".

La ruta va entamase'l sábadu y el día 26, con El Campillín como puntu d'aniciu a les 18 hores. Tien un llargor de 2 hores y el so costu ye de 5 euros –los menores de 12 años pueden participar de baldre–, cola necesidá d'acutar plaza previamente al traviés del corréu electrónicu infoserasturianu@gmail.com o del númberu de teléfonu 626.221.712 al ser les places llendaes.

Pa la ellaboración d'esta ruta, Ser Asturianu contó col asesoramientu de la Fundación Juan Muñiz Zapico. Otra manera, los participantes nesta ruta podrán esfrutar de regalos y descuentos na campaña de cuestación popular na rede de 'Depués d’ochobre', el primer xuegu físicu de rol fechu n’asturianu.