'Depués d'ochobre' algama'l so oxetivu en 4 hores y media

Enantes de la presentación nel Manglar los autores yá recaudaren los 2.500 euros necesarios pa facer realidá esti xuegu de rol.

'Depués d'ochobre' ta siendo un ésitu, como amuesen les importantes cifres que ta algamando la cuestación popular na rede entamada na plataforma Verkami. Ésta echó a andar a les 10 hores del sábadu, coincidiendo col 85 aniversariu de la Revolución d'Ochobre del 34, y en 4 hores y 34 minutos yá consiguiera'l mínimu pa convertir esti proyeutu de Nicolás Bardio y Xon Delacampa, responsables de les ilustraciones, en realidá.

Pero nun quedó sólo ehí. Depués de la presentación prevista nel Manglar a les 19 hores, llegaría a doblar dicha cantidá: 5.000 euros en 12 hores.

Nel momentu de redautase esta noticia, el xuegu d'espíes basáu nuna ucronía na que trunfa la Revolución del 34 n'Asturies y el país pasa a formar de la Xunión de Repúbliques Socialistes Soviétiques lleva acumulaos 6.567 euros, lo que permitió desbloquiar trés oxetivos ampliaos, un mapa físicu y un poster de propaganda diseñáu pal xuegu. Nel casu d'aumentar la cifra, los autores tienen preparaes otres munches aventures y materiales.

La xente interesao en facese col llibru del primer xuegu de rol físicu n'asturianu va atopar na web de la cuestación popular delles opciones y recompenses. Nesi sen, los sos autores asoleyaron numberosos materiales al rodiu d'esta ucronía, que van dende banderes de la República Socialista Soviética d'Asturies a insinies col escudu de la mesma.

Na semeya, Bardio y Delacampa na presentación del Manglar cola bandera de la RSSA diseñada pal xuegu presidiendo.