Piñán emplega’l castellanu na so primer intervención en Plenu de la Xunta

Una entruga de Ciudadanos sobre’l próximu Xacobéu llevó a la primer intervención en Plenu de la conseyera Berta Piñán, na que tuvo qu’emplegar el castellanu pola interpretación que dan del reglamentu de la Xunta Xeneral los lletraos de la Cámara. Hasta qu’ésti nun se modifique nun podrá usar l’asturianu.

Luis Armando Fernández Bartolomé, precisamente ún de los diputaos que-y negaron esti derechu la selmana pasada na Comisión de Cultura, Política Llingüística y Turismu, encargóse de facer la pregunta: “¿Qué actuaciones tiene prevista su consejería, su Gobierno, de cara a la celebración del Xacobeo 21?”. Piñán, tres dar les “gracies” al presidente de la Xunta Xeneral, Marcelino Marcos, que-y dio pasu previamente, fixo usu del castellanu pa responder al parllamentariu de Ciudadanos.

Asturies pela Izquierda rexistró’l miércoles pasáu, al día siguiente de la comisión, una propuesta pa la modificación del reglamentu “pa garantizar la posibilidá del usu del asturianu por cualquier persona nel Parllamentu autonómico y evitar que, como asocedió ayeri, nengún grupu pueda impedir que comparecientes ensin acta de diputáu puedan utilizar la llingua vernácula”. Podemos, que protestó nel momentu de la situación, y la FSA amosaron la so disposición d’esti cambiu nel reglamentu, anque nel casu de los socialistes paez nun haber priesa, yá que cuenten con entamar una reforma xeneral del mesmu, con un alderique na Xunta Xeneral, lo qu’allargará los plazos.

Mientres tantu, Piñán va vese obligada a usar el castellanu en too momentu pola interpretación que faen del testu los lletraos de la Cámara, ensin tener en cuenta la Llei d’Usu y Promoción del Bable/Asturianu nin la Consitución. Asina, si un diputáu diz nun entender l’asturianu, cualquier miembru del Conseyu de Gobiernu que nun sía parllamentariu deberá emplegar el castellanu, idioma oficial, teniendo namái el derechu a falar en llingua asturiana na Xunta Xeneral los diputaos.

Entruga sobre l’asturianu a Barbón

El presidente Adrián Barbón va responder na sesión de mañana a les primeres entrugues d’esta llexislatura rexistraes polos grupos parllamentarios. Una d’elles va ser sobre l’asturianu, en concreto de VOX, que quier saber de boca del socialista si “¿está usted dispuesto a llevar el uso del bable en la Junta General del Principado de Asturias hasta tener que contar con intérpretes en esta Cámara?”.

Semeya obra d'Armando Álvarez.