Piñán recibe "coles manes abiertes" la modificación del reglamentu

"Tolo que dea llibertaes y derechos fundamentales, como ye espresase na propia llingua, ta mui bien", diz la conseyera.

Berta Piñán acudió esta mañana al actu d'inauguración de la muestra 'Chapeau! De Casas y Picasso a Balenciaga y Pertegaz', que se pue visitar na Sala d'Esposiciones SabadellHerrero, n'Uviéu. Tres la mesma opinó, a entrugues de los periodistes, sobre la futura modificación del reglamentu de la Xunta Xeneral que sofiten FSA, Podemos y Asturies pela Izquierda, pa evitar situaciones como la que vivió na Comisión de Cultura, Política Llingüística y Turismu, cuando-y torgaron el so derechu a espresase n'asturianu.

"Taría bien, dende llueu que sí. Ye sólo una propuesta y espero que siga alantre", apuntó la escritora, pa depués añadir que "too reglamentu de la Xunta que dea llibertates y derechos fundamentales, como ye espresase na propia llingua, ta mui bien y por supuesto yo la recibiré coles manes abiertes".