El VII Día de la Reciella yá tien fecha: el 13 d’ochobre

‘Reciella. Families pol Asturianu’ dio a conocer la fecha del VII Día de la Reciella, que se caltién n’ochobre, anque se tresllada al segundu domingu del mes. Asina, la gran fiesta d’ociu familiar y convivencia col asturianu como llingua vehicular va celebrase’l día 13 nel Muséu del Pueblu d’Asturies con una llista amplia d'actividaes de baldre.

‘N’asturianu ¡presta pola vida!’ ye’l lema d’esta edición del Día de la Reciella, qu’inclúi na so programación ‘Entaína’, la carrera familiar de relevos pol asturianu que representa la tresmisión oral del idioma de güelos y padres a nietos y fíos. Ésta será la cuarta ocasión na que s’entame esta prueba accesible pa xente de toles edaes.

Conciertos, talleres, xuegos, gastronomía y más deporte, cola llingua asturiana como protagonista, van completar una xornada destinada pa la reciella, pero na que tolos presentes disfrutan. L’accesu al Muséu del Pueblu d’Asturies ye de baldre.

Otra manera, Marco Recuero encargóse un añu más del diseñu del cartelu del Día de la Reciella. La d’esta edición representa a un neñu mirando a les estrelles per un telescopiu en compañía de la so madre y recuerda a les ilustraciones de la popular novela ‘El principín’.