El Descensu Internacional del Seya torna a buscar ganadores

Per segundu añu siguíu, el K-2 vencedor de la edición pasada nun sal a competir.

Torna la Fiesta de les Piragües. Esti sábadu celébrase el LXXXIII Descensu Internacional de Seya, espectáculu con trescendencia más allá de les nueses llendes y qu'axunta a miles de persones nel tramu del ríu que va de Les Arriondes a Ribeseya.

Milín Llamedo, con una lesión nel brazu, nun va poder participar, polo que'l K-2 que formaba con Pedro Vázquez nun va tomar la salida. Los dos palistes parragueses asaltaron la meta de la ponte de Ribeseya l'añu pasáu na primer edición ensin Walter Bouzán y Álvaro Fernández Fiuza tres ocho años de dominiu y, nesta ocasión, el Seya busca ganadores nuevos.

Ente los favoritos tán les trés piragües qu'ocuparon el podiu del Campeonatu d'Europa de Maratón, celebráu na población borgoñona de Decize'l domingu: la francesa de Quentin Urban y Jeremy Candy, la húngara de Adrian Boros y Krisztian Mate, y l'asturlleonesa de Miguel Fernández Castañón y José Julián Becerro. A ellos hai que sumar a los sudafricanos Hank McGregor y Wayne Jacobs, y al cántabru Julio Martínez, once veces ganador del Seya en K-2, que compite nesta ocasión xunto col asturianu Emilio Llamedo Iglesias, primu de Milín, y va ocupar el primer puestu de salida al marcar el meyor tiempu na prueba contrarreló pa establecer los cabeza de serie.

La salida de la prueba va tener llugar na ponte de Les Arriondes a les 12 hores, tres la llectura del pregón a cargu del cocineru Nacho Manzano y la interpretación del himnu d'Asturies en comuña por tolos presentes. La prueba pue siguise en direuto al traviés de TPA.