Preséntase de forma pública la organización de ciencies Sabencia

Tien activu na rede dende abril un Nomenclátor de los Seres Vivos en Llingua Asturiana, que cuenta con 3.000 entraes.

La so ellaboración foi l'orixe de Sabencia, que tien detrás más de 3 años de trabayu. Un llabor que desendolcó un equipu conformáu por Guillermo César Ruiz (departamentu de Botánica), Berto Ordiales (Botánica y Zooloxía), Rubén Fernández (Zooloxía, Meteoroloxía y Ciencia Casera), Pelayu Valduvieco (Filoloxía) y Llorián Cueto (Zooloxía), encargándose Iñigo Varela, persona de la que surdió la idea del nomenclátor, del desarrollu informáticu.

Ésti permite la consulta fungos, plantes y animales al traviés d'un restolador pol so nome n'asturianu, castellanu, inglés o'l nome científicu, amás d’una busca por categoría taxonómica (reinu, clas, orde, xéneru y familia). Cada entrada cuenta con una semeya del ser vivu y una ficha qu’esplica el porqué del nome referencial propuestu, les variantes dialeutales recoyíes hasta la fecha, la so etimoloxía, la so distribución xeográfica, la toponimia venceyada y otru tipu d’información que s’estima oportuna.

Un aspeutu importante de la iniciativa ye la propuesta que fai d’un nome n’asturianu como nome referencial de cada especie, al igual que se fixo en toles llingües de la nuesa redolada, siguiendo siempre criterios filolóxicos. La "organización de ciencies asturiana que s’espresa n’asturianu" va esplicar esta cuestión y los otros proyeutos que tien en marcha nun actu que va servir de presenteción pública de Sabencia esta tarde, a les 19 hores nel Club Prensa Asturiana (Calvo Sotelo 7, Uviéu), cola presencia d'Ordiales, Fernández, Valduvieco y Cueto.