973.738 persones tienen derechu al votu nes Nacionales del 26-M

El 26 de mayu van celebrase les eleiciones a la Xunta Xeneral, que coinciden coles Europees y llocales. Un total de 973.738 persones tienen derechu al votu, de les que 855.873 moren nel Estáu y 117.865 fuera del mesmu, según informó esti martes el Gobiernu.

El conseyeru de Presidencia y Participación Ciudadana, Guillermo Martínez Suárez, participó, a pidimientu propiu, na diputación permanente de la Xunta Xeneral pa dar detalles sobre la campaña institucional d’ información de les Nacionales, que se va desendolcar del 10 al 24 de mayu. El presupuestu de llicitación d'esta iniciativa asítiase en 29.000 euros y la información va espublizase, ente otros, en medios de comunicación de titularidá pública –en cumplimientu de la normativa vixente y al igual que na convocatoria de 2015–, concretamente en RTPA y nos programes de desconexón territorial de RTVE.

L'Executivu dirixóse tamién a los conceyos pa que puedan incluyir los anuncios, con calter gratuitu, en medios de comunicación municipales, y hasta’l momentu confirmaron la so collaboración una ventena de conceyos. Les empreses que presentaron propuestes pa desenvolver la campaña son Bittia, Impact 5, Publiestrategia S.L. y Eteria Publicidá, Marketing y Comunicación S.L.

Na so intervención, Martínez dio tamién datos sobre les eleiciones, como que 973.738 persones tienen derechu al votu, de les que 855.873 moren nel Estáu y 117.865 fuera del mesmu, o que mañana’l BOPA va espublizar les candidatures. Tamién recordó que’l votu per corréu va poder solicitase hasta’l día 16, mentes que’l 21 ye la fecha llende pa qu’exerzan el votu los residentes nel estranxeru o temporalmente ausentes.

Tola información al respeuto pue consultase nesta web.