Podemos considera “una vergoña” l’argumentu de Martínez pa nun usar l'asturianu na campaña del 26-M

|
Podemos considera “una vergoña” l’argumentu de Martínez pa nun usar l'asturianu na campaña del 26-M

“Nun esisten precedentes pa facelo” foi l’argumentu qu’utilizó Guillermo Martínez Suárez, conseyeru de Presidencia y Participación Ciudadana, pa nun contemplar l’emplegu del asturianu na campaña informativa pa les eleiciones nacionales del 26-M. Podemos considera “una vergoña” la esplicación dada pol socialista.

Martínez Suárez fixo esta declaración ayeri na rueda de prensa posterior al Conseyu de Gobiernu al ser entrugáu pola quexa previa de Podemos por nun incluyir l’asturianu y el gallego-asturiano na campaña institucional d’ información de les Nacionales, de la que presentó detalles el martes a la diputación permanente de la Xunta Xeneral. Que nunca s’emplegara previamente foi l’argumentu dao pol voceru del Executivu pa nun facelo agora.

Enrique López Hernández, voceru de Podemos, calificó de “burlla” el mesmu fechu de que nun s’incluya l’asturianu na campaña, “pero qu’un conseyeru d’esi mesmu Gobiernu dea como esplicación política que ‘nun esisten precedentes pa facelo’ ye cenciellamente una vergoña”. Na so opinión , l’usu del idioma nesti tipu de campañes “debería de ser una obligación” pal Executivu, más cuando “el Gobiernu pertenez a un partíu, la FSA-PSOE, que diz defender la oficialidá”.

Amás, Podemos entrúgase qué opinión tien el secretariu xeneral de la FSA, Adrián Barbón, y la militancia, “de que los sos propios compañeros de partíu dean nuevamente’l llombu a los derechos de los asturianos y de les asturianes”.

Semeya obra d'Armando Álvarez.

Contador Estadistiques