L'Acebu nun va ser final d’etapa na LXII Vuelta a Asturies

La Vuelta a Asturies va contar un añu más con 3 etapes, con salida’l 3 de mayu n’Uviéu y llegada el 5 nel mesmu llugar, pero ensin el tradicional final en L’Acebu, anque sí va xubise na segunda xornada, con meta en Cangas del Narcea. La carrera asturiana, a diferencia de La Vuelta, respeta la toponimia tradicional, la oficial.

El vienres 3 de mayu va ser la salida de la primera etapa, Uviéu-La Pola Ḷḷena, con pasu pel altu de Carabanzo en dos ocasiones nel tramu final. La segunda va partir de Soto Ribera, pa finar na cai Uría de Cangas tres xubir L’Acebu.

Esti altu ye’l puertu referente de la Vuelta a Asturies, pero la organización, el Club Ciclista Aramo, decidió nesta ocasión que nun fora final d’etapa. La razón ye que L’Acebu va ser meta en La Vuelta’l 8 de setiembre, Día d’Asturies, lo que supón la so estrena na carrera española como llegada.

El domingu 5 va tener llugar la xornada final de la sesenta segunda edición de la competición asturiana, con salida de Cangas y final n’Uviéu. El Violéu, a ocho quilómetros de la meta, podría decidir la Vuelta a Asturies nel casu de que se llegue a la etapa cabera con poques diferencies na xeneral.

Ausencia de Carapaz

L’actual campeón, l’ecuatorianu Richard Carapaz, podría nun tomar la salida n’Uviéu, siendo’l xefe de files del so equipu, el Movistar, previsiblemente Mikel Landa. El conxuntu español va ser l’únicu de categoría UCI WorldTeam que compita, con otros siete Continental nel pelotón de los 16 confirmaos.