El borrador del Estatutu de les Empreses Lletrointensives nun convence a naide

El Gobiernu sumóse al descontentu xeneral col borrador del Estatutu de les Empreses Lletrointensives redautáu pol Executivu de Pedro Sánchez amosáu pola industria, los trabayadores y los partíos políticos. El conseyeru Isaac Pola confirmó que va presentar alegaciones énte unes midíes “positives pero insuficientes”.

Pa ello tendrán hasta’l miércoles próximu. “Añaden beneficiu respeuto a lo qu’hai anguaño disponible”, consideró responsable d’Emplegu, Industria y Turismu, que darréu señaló “que tamos trabayando pa facer un análisis completu de los documentos espublizaos” pa presentar unes alegaciones “que nel so conteníu sustancial dirán na llinia de tratar d’aprovechar d’apurar al máximu les posibilidaes qu’ufre la normativa comunitaria en cuanto a la dotación de la partida correspondiente a la compensación de costos indireutos de CO2”.

“Esta ye una primera valoración”, siguió’l conseyeru sobre’l borrador d’un proyeutu de real decretu “insuficiente p’atacar una solución definitiva del problema”. No que nun quixo entrar Pola foi na posición amosada por Alcoa, que señaló que la propuesta del Gobiernu estatal “nun da soluciones” y qu’inclusive pon en riesgu la tercer planta de la multinacional n’España, la de San Cibrao, una posición que’l secretariu xeneral de la FSA Adrián Barbón calificó de “indecente”.

Tampoco nun cuenta col sofitu de los trabayadores d’Alcoa n’Avilés, que consideren curtiu l’estatutu hasta’l puntu de poner en peligru la llegada d’inversores pa les plantes afeutaes, nin pa FADE al nun asegurar “una tarifa competitiva”, nin pa Podemos, IX, PP, Foro o Ciudadanos.

Na imaxe, Pola y el conseyeru de Presidencia y Participación Ciudadana, Guillermo Martínez Suárez, tres el Conseyu de Gobiernu d'esta mañana. Semeya obra d'Armando Álvarez.