Xune Elipe recopila nun llibru los sos artículos en prensa como edil d'Avilés

Trátase d'una esbilla de los testos más intemporales sobre asturianismu, llingua o cultura escritos mientres esta llexislatura.

'Dende la casa conceyu' ye'l nome del llibru que ta acabante d'asoleyar Xune Elipe Raposo. Editáu pol grupu municipal de Somos Avilés, axunta más de trenta artículos periodísticos del mediu centenar qu'espublizó'l de Villalegre nestos casi cuatro años como conceyal en dellos medios de comunicación asturianos, ente ellos Asturies.com.

Asina, incorporó nesta escoyeta 'La transición asturiana', asoleyáu nesti mediu'l 20 de xunetu del 2015, y  'Pasáu, presente y futuru de la Llingua Asturiana n'Avilés', el 6 de mayu del 2016. "Toos ellos tán revisaos y actualizaos, y inclusive aumentaos, yá que los qu'apaecieron en prensa escrita munches vegaes nun s'espublizaron completos por falta d'espaciu", apunta Elipe.

El conceyal de la candidatura de xunidá popular divide'l llibru en delles estayes: asturianismu, llingua asturiana, actualidá política y municipal, cultura, música y remunicipalización. Tolos artículos espublizáronse nos medios en llingua asturiana y son "el resume d'un tiempu nel que reflexoné, fixe propuestes, compartí esmoliciones y critiqué too aquello colo que nun taba d'alcuerdu; too ello dende la consciencia de les contradiciones que supón la política institucional y la xenerosidá qu'hai que practicar al trabayar con xente de cultures polítiques distintes a la d'ún".