Xune Elipe: “Sigo creyendo nuna opción política asturiana, que pueda llegar a alcuerdos con organizaciones estatales pero que les decisiones se tomen equí”

Tres cuatro años como edil por Somos Avilés, Xune Elipe (Villalegre, 1962) fala con Asturies.com sobre esta etapa, de la que se despidió editando un llibru recopilatoriu d’artículos espublizaos nesti tiempu, de nome ‘Dende la casa conceyu’. La situación política del país, el so proyeutu audiovisual nuevu y el discu de Dixebra tamién salen a rellucir.

¿Cómo valora la so esperiencia de conceyal?

Personalmente como positiva. Valióme pa conocer de primer mano cómo ye la vida política ‘del otru llau’, dende les instituciones, y conocer meyor tolo que tien alredor: intereses, burocracia, trampes, posturéu... A nivel de trabayu toi contentu del mio llabor, defendí aquello no que creo; fui lleal a les decisiones del grupu pero ensin arrenunciar a tener voz propia y ehí tán, por exemplu, les mios intervenciones plenaries.

¿Pudo desendolcar tolos oxetivos que se marcó al principiu de la llexislatura?

Con esta cuestión tengo una sensación contradictoria. Per una banda sé que fixe tolo que taba na mio mano por algamar determinaos oxetivos, pero per otra siéntome frustráu de nun llegar a consiguir dellos que me paecíen importantes. Llogremos qu'una bona parte de la ciudadanía s'enfotare en nós pa intentar iguar determinaos problemes. Namás hai que ver la xente que pasó pel local municipal del nuestru grupu na llexislatura pasada porque creyíen que yéremos la ferramienta meyor pa ello. Dimos visibilidá a dellos asuntos que de nun ser por nós nun se tendríen solucionao. Amás creo que fiximos más tresparente'l funcionamientu y les decisiones que se tomaben nel ayuntamientu.

Otra cuestión son dellos oxetivos, digamos, más personales y venceyaos a la mio trayectoria como activista llingüísticu. Cumplí con aquello que llevo defendiendo dende cuantayá: la xente que tamos por que la lligua asturiana tenga un espaciu dignu y vivu na sociedá asturiana tenemos que ser instrumentos de normalización. Nesti sen toles mios intervenciones plenaries y en comisiones, toles mios comunicaciones col públicu, tolos mios artículos en prensa y toles entrevistes que fixi foron siempre nesta llingua. Otra manera, llogremos que saliere alantre una moción apoyando la oficialidá, que determinaos conceyales del gobiernu y la oposición –non toos– tuvieren una mayor sensibilidá cola cuestión llingüística y que s'aprobare la ellaboración d'unes ordenances d'usu que, por desgracia, tovía nun se fixo efectiva.

¿Qué pasó pa nun poder sacar alantre la ordenanza d'asturianu?

Creo que foi una cuestión de dexadez y, finalmente, de cobardía per parte del gobiernu. La secuencia foi la siguiente: al añu d'entrar na corporación planteguémos el tema nun Plenu (depués de tener falao con tolos grupos municipales) y llogremos que s'aprobare (namás votó en contra'l grupu popular), el gobiernu nun se punxo a ello hasta bien de tiempu depués y por fin presentó un proyectu de redacción que tábemos dispuestos a aceptar anque fuere de mínimos, pero entós vinieron les denuncies del PP a les ordenances de dellos conceyos y escomenzaron los retrasos y les escuses pa nun llevar la Ordenanza al Plenu pa la so aprobación definitiva; la falta d'interés del PSOE y el mieu a que'l PP presentare una denuncia foron los motivos que torgaron que güei Avilés cuente con esa normativa. Nós intentemos nún de los últimos Plenos forciar a que s'aprobare, pero los socialistes avilesinos prefirieron votar conxuntamente col PP y C's y refugar la propuesta. Nesi Plenu la conceyala de cultura comprometióse a llevar na presente llexislatura l'aprobación de la Ordenanza d'Usu del Asturianu. Ver veremos...

Nestos cuatro años protagonizó alderiques caldiaos con ediles d'otros partíos al respeuto d'esti asuntu y otros. ¿Sorprendió-y el nivel de desconocimientu del idioma y de la cultura asturiana de munchos d'ellos?

Pues la verdá que non. Llevo más de la metá de la mio vida defendiendo y lluchando por determinaos ideales, como militante y activista, pero tamién nel mio llabor profesional formando parte d'eso que llamen industria cultural, y son munches les ocasiones en que m'alcontré responsables políticos con una desconocencia absoluta de la cultura asturiana (y nun digamos yá del idioma) y en xeneral d'esti país. Lo único que fixe nos cuatro años que tuvi dientro de les instituciones foi comprobalo y reafirmame nello: tenemos la desgracia de padecer una clas política (y equí incluyo a persones de tolos partíos) inorante de la so propia tierra, y amás faen gala d'ello.

Muncho del so llabor como conceyal puede atalantase lleendo ‘Dende la casa conceyu’. ¿Qué recueye esti llibru?

Ye una escoyeta de los artículos que fui publicando a lo llargo del tiempu que tuvi de conceyal. Foron cásique una cincuentena d'ellos y nel llibru apaecen aquellos que tienen un calter intemporal, que son más xenéricos y tovía tienen vixencia. Los temes trataos son pervariaos, como consecuencia de los asuntos que llevé directamente nel Ayuntamientu, y otros que son recurrentes en mi como l'asturianismu.

¿Qué lu llevó a recopilar toos ellos nuna obra?

Yera un poco por mostrar que dende posiciones netamente asturianes pueden tratase tou tipu de cuestiones qu'afecten al país, seyan de la naturaleza que seyan.

Dalgunos d'estos artículos asoleyáronse n'Asturies.com.

Sí, foi una manera d'apoyar a un mediu d'información en llingua asturiana como ye ésti.

¿Sigue trabayando con Podemos Avilés dende fuera de la Casa Conceyu?

La verdá que nun tengo muncho contactu últimamente. El mio llabor profesional nun me lo permite, anque de xemes en cuando faigo dalguna suxerencia o écho-yos un gabitu. Nos cuatro años que tuvi de conceyal tengo que dicir que me sentí arropáu por munchos y munches compañeres y el grupu municipal que formemos resultó y funcionó realmente bien.

¿Cómo ve la situación política anguaño d'Asturies?

Depués d'esta esperiencia vuelvo a la mio independencia partidista (la ideolóxica mantúvela siempre) y eso date una visión más amplia de la realidá. Sigo creyendo firmemente nuna opción política esclusivamente asturiana, que pueda llegar a alcuerdos con otres organizaciones estatales pero que les decisiones siempre se tomen equí. Fai falta crear un ‘frente ampliu’ asturianu, onde puedan trabayar conxuntamente persones de cultures y trayectories polítiques diferentes (eso sí, siempre dende los valores del progresismu y la izquierda), con visiones distintes sobre l'articulación del nuestru país nel Estáu (soberanistes, federalistes, autonomistes) pero col enfotu de facer política por, pa y n'Asturies. La debilidá del asturianismu políticu ye dalgo endémico y la realidá ye la que ye, asina que si queremos salir de la intrescendencia nun nos queda otro qu'intentar caminos nuevos. Nun primer momentu pensé que Podemos Asturies (al traviés fundamentalmente de Somos Asturies) podría llegar a xugar esi papel, pero los intereses personales y les guerres internes, amás de la desarticulación del asturianismu, torgaron siquiera poder plantegar esi procesu. La onda espansiva madrilana (centralismu, ellaboración de llistes electorales, ‘pablistes’, ‘errejonistes’), de la que los dirixentes asturianos intentaron escapar, afectó-yos tamién a ellos.

No que respeuta al asturianu paez qu'hai avances nun sen mientres dellos sectores traten de torgar el so usu nun espaciu nel que nun yera estrañu como la Xunta Xeneral.

Entra dientro de lo esperable. A mayor concienciación y reivindicación mayor represión y intolerancia. N'Asturies nun hai una normalización social del idioma, pero sí una normalidá social del mesmu. Cada vez faise más común la presencia del asturianu n'ámbitos onde enantes nun taba y eso molesta y incomoda a determinaos partíos qu'al nun saber cómo encarar l'asuntu siéntense amenazaos. Tán dándose cuenta de qu'esto va en serio, que más allá de la ‘intimidá’ o'l chigre realmente queremos vivir n'asturianu, con tolo qu'ello significa.

¿Ye optimista de cara a una oficialidá cercana?

Depués de más de cuarenta años de reivindicación llingüística nesti momentu nun nos podemos permitir decayer o dexanos llevar pol pesimismu. Nunca tuviemos más cerca de llograla. Agora lo que toca ye tar sollertes pa que nun nos dean gatu por llebre. Nel Estáu español oficialidá namás hai una (nin ye amable nin ye fosca); lo qu'hai son desarrollos llexislativos diferentes d'ella y ehí sí habremos d'adecuala a la nuestra situación sociollingüística. Pero... ¡güeyu! Nun nos vayan colar dalgo que tien esi nome pero que nun ye tal.

No que respeuta al so llabor profesional, ta metíu nun proyeutu audiovisual nuevu. Fáleme d'él.

Trátase d'una serie documental de cinco capítulos d'unos cincuenta minutos caún sobre la historia de la música asturiana dende qu'hai rexistros sonoros, esto ye, dende principiu del sieglu XIX hasta agora. Va llamase 'D'ayeri a güei' y la intención ye emitila al traviés de la TPA. Nella va falase cronolóxicamente de los principales movimientos que se dieron na escena de lo que llamamos música d'espresión asturiana (Nacionalismu Musical Asturianu, Folk Testimoniu, Nuevu Canciu Astur, Música Celta, Rock Astur, Post-Folk, etc.) y los y les sos intérpretes principales. Pa ello entrevistemos a unes cuarenta persones del mundu académicu (historiadores, antropólogos, etc.), periodistes, músicos, folcloristes... Fíxose amás un llabor de busca d'archivos audiovisuales y gráficos importante y mesmamente vamos poder ver dalgún material inéditu. La verdá que tol equipu (formáu por seis persones) tamos mui ilusionaos y más en viendo la espectación que tamos percibiendo.

Dixebra anunció discu nuevu. ¿Cómo va?

Nesti momentu tenemos compuestos (lletra y música) una quincena más o menos de temes y tamos grabándolos en maquetes pa ver qué sensación nos dan, facer arreglos y correxir cosuques.

¿Va siguir la llinia de los trabayos anteriores?

Sí, va ser mui variáu. Hai temes de munchos palos: punk, reggae, ska, funk, folk, rap, metal... Lo que lo diferencia de trabayos anteriores ye que les lletres xiren toes alredor de la memoria colectiva d'Asturies, son cásique como una historia social de la nuestra tierra, con munches referencies a socedíos históricos (Revolución d'Ochobre, resistencia antifranquista, emigración, represión obrera, la ‘Fuelgona’...).

¿Pa cuándo tienen previsto que tea na cai?

En principiu vamos ver si podemos entrar nel estudiu de grabación p'hacia marzu o abril pa que salga na primavera y poder dir presentándolu en directo nos conciertos del branu.