Barreiro algama’l so segundu Premiu Máximo Fuertes Acevedo
- Un ensayu de Barreiro sobre la importancia de la programación televisiva infantil na normalización del idioma, XX Premiu Máximo Fuertes Acevedo
- Santori algama’l XXIII Premiu Máximo Fuertes Acevedo d’ensayu
- El Paraninfu de la Universidá d’Uviéu acueye la entrega de los Premios Lliterarios 2018 y del Nel Amaro de teatru
- Barreiro presenta ‘Asturploitation’, l’ensayu col que ganó’l so segundu Máximo Fuertes Acevedo
- Manuel García Menéndez y Damián Barreiro cítense colos sos llectores
- Barreiro gana, otra vegada cuatro años depués, el Premiu Máximo Fuertes Acevedo d’ensayu
|
20 Payares, 2018 por Pablo R. Guardado
- Inicie sesión o rexístrese pa espublizar comentarios
‘Asturploitation’, de Damián Barreiro, resultó l’ensayu ganador del XXIV Premiu Máximo Fuertes Acevedo. El periodista repite cuatro años depués como vencedor d’esti gallardón que forma parte de los Premios Lliterarios de la Conseyería d’Educación y Cultura.
Centrada nel sector audiovisual y na posibilidá de crear una industrial al so rodiu que sirviera a los asturianos pa sentise reflexada nella, la obra de Barreiro, presentada baxo’l nomatu de Muxidora Brown, convenció al xuráu por “la relevancia social del tema tratáu y la propuesta estratéxica que fai pal impulsu del sector audiovisual en llingua asturiana, documentada con minuciosidá y rigor”. Fernando Padilla, direutor xeneral de Planificación Llingüística y Normalización, presidió’l mesmu, que taba formáu por Xuan Santori, ganador de la edición pasada con '42.553: depués de Buchenwald'; la escritora Marta Mori; la direutora xeneral d’Universidaes y Investigación, María Cristina Valdés; y los filólogos del Serviciu de Planificación Llingüística y Normalización Xosé Miguel Suárez Fernández ‘Tapia’ y Luis Casteleiro.
Asina mesmo, l’acta del premiu, con una recompensa de 3.000 euros, destacó la singularidá y el valir de tolos trabayos presentaos. Ésta ye la segunda vegada que Barreiro algama’l Máximo Fuertes Acevedo, yá que nel 2014 llevólu con 'Caleya Sésamu: el papel de la televisión na tresmisión interxeneracional d’una llingua.
Nacíu nel 1984 en Galicia, anque criáu n’Avilés, encárgase anguaño de la estaya d’asturianu de l’axencia de noticies Europa Press. Enantes fora redautor d’Asturies.com o de Les Noticies, ente otros medios.
Falta por conocer el Xosefa Xovellanos
De los Premios Lliterarios 2018 queda entovía por conocer el XXXIX Xosefa Xovellanos de novela. El X Premiu Alfonso Iglesias de cómic foi pa ‘Cacique blancu’, d’Anxelu González Fernández, mentes que’l XI Premiu María Xosefa Canellada de lliteratura infantil y xuvenil llevólu la obra ‘Invisible’, de Lluis Aique Iglesias Fernández, y el XXIV Premiu Xuan María Acebal de poesía 'Allumamientu’, de Pablo Texón.
Na semeya, últimes obres ganadores del Premiu Máximo Fuertes Acevedo d'ensayu.
Efrén d'Andrés
