Un llargu asturianu va participar per primer vegada na actual seición oficial del FICXixón

Trátase de 'Cantares de una revolución' de Ramón Lluís Bande, un musical protagonizáu por Nacho Vegas sobre Ochobre del 1934.

El direutor asturianu torna a la competición del Festival Internacional de Cine de Xixón (FICXixón), en concreto con un llargumetraxe na seición oficial, convirtiéndose asina na primer participación nacional dende va más de dos décades, esto ye, col formatu actual. Fiel al so carauterísticu cine resistente, Bande, cola complicidá del músicu Nacho Vegas, percuerre dalgunos de los socesos y escenarios más significativos de la insurreición de los obreros y la xente del campu asturianu nel mes d'ochobre del 34, nel momentu en que se cumple’l so 84 aniversariu.

En 'Cantares de una revolución', que va estrenase nel LVI FICXixón (del 16 al 24 de payares), Vegas percuerre dalgunos de los sitios más representativos de la última revolución proletaria n’Europa occidental, cola música popular como mapa y les pallabres de Belarmino Tomás, presidente del Tercer Comité Revolucionariu, como brúxula: "Trabayando coles palabres de Belarmino Tomás –pa min la figura política más importante del sieglu XX n’Asturies– y colos cantares populares nacíos de la propia insurreición, atopé una forma cinematográfica que me permitía averame d’una manera mui procurosa a lo que foi la Revolución", comenta Bande.

La cinta ye una película cantada, contada y lleída: “Filmar persones lleendo –tamién cantando– siempre me paeció un recursu mui cinematográficu, pesie a lo qu’avecen dicir los profesionales y los manuales. Planos estáticos onde daquién llee –o canta– énte la cámara, cola voz abellugada pol soníu natural del espaciu nel que llee, radicalmente venceyáu col conteníu del testu lleíu, como un mou d’invocar el pasáu nel presente".

La película cuenta los primeros momentos de la Revolución del 34 n’Asturies, cola toma de los cuarteles en Sama; la entrada de los Regulares n’Uviéu; la destruición de la Universidá; l’asesinatu d’Aida de la Fuente; l’alcuentru ente Belarmino Tomás y el xeneral López Ochoa pa "organizar la paz"; o'l discursu del mesmu Tomás nel balcón de la casa conceyu de Sama rindiendo la Revolución. A lo llargo d’esti viaxe, Vegas interpreta, adaptaos o reescritos, ocho cantares populares de la revolución, como 'Una mañana', 'Asturias, tierra bravía', 'Aida de la Fuente' o 'Asturies desventurada'.

Puesta n'escena diferente respeuto a títulos anteriores

'Cantares de una revolución' propón una puesta n’escena diferente a la de los títulos últimos del direutor, presentaos tamién nel FICXixón, 'Escoréu, 24 d’avientu de 1937' y 'Aún me quedan balas para dibujar', colos que participó na Competición Internacional Rellumes y na Seición Oficial de Curtiumetraxes, de manera respeutiva. D’esta miente, Bande cortexa con delles carauterístiques d’un tipu de ficción desdramatizada: "Hai una puesta n’escena falsamente teatral qu’atalanto que funciona mui bien pa crear el distanciamientu necesariu ente lo contao y l’espectador".

Na película'l públicu va atopar munches de les constantes estétiques y étiques del cineasta xixonés. Él mesmu les apunta: "L’emplegu del planu-secuencia, la duración, el focu na memoria política comunal de les y los asturianos; la dialéutica pasáu-presente nel rexistru de los espacios naturales; la utilización de material d’archivu, dende la conciencia de que ye elli quien nos mira y quien ta llamándonos seliquino, más que nosotros a él; el protagonismu, equí cuasi absolutu, de la música popular, y la memoria oral que, anque nesti casu nos llegara escrita, nun primer momentu foi palabra falada".