Día del Llibru Asturianu

84 años del comienzu de la Revolución d'Ochobre del 34

|
84 años del comienzu de la Revolución d'Ochobre del 34

Tal día como esti vienres, 5 d’ochobre, d’hai 84 años dio aniciu una fuelga xeneral en casi tol Estáu. Asturies foi’l territoriu onde les reivindicaciones tuvieron un siguimientu más importante, entamándose una revolución nel nuesu país con ecu en tol planeta.

Les órdenes llanzaes dende Madrid pal comienzu de la fuelga diéronse a última hora del día 4, pa principiar coles movilizaciones na madrugada del 5. N’Asturies, atacáronse dellos cuarteles de la Guardia Civil y declarábase n’Uviéu la República Socialista d’Asturies, que taría en pie per 15 díes, hasta’l 18 d’ochobre, tres negociar Belarmino Tomás la rendición de los revolucionarios.

“La revolución asturiana tuvo una repercusión internacional impresionante que tovía ta por esplicar”, destacó a Asturies.com Faustino Zapico nuna información pasada, historiador qu’asegura qu’esti acontecimientu “punxo a Asturies nel mapa”. El fechu de que trunfara una revolución socialista que mantuvo’l poder per 15 díes yera dalgo tán destacao como pa ocupar les fueyes de periódicos de toles tendencies ideolóxiques a lo llargo de tol mundu. La xunidá del movimientu obreru n’Asturies foi clave pa que la revolución tirara p’alantre nel país, dalgo que nun se cumplió n’otros puntos del Estáu, fracasando una insurrección “mal plantegada” dende un entamu.

Sobre los motivos que llevaron a esti clima revolucionariu nel Estáu, Zapico afirma que’l so orixe tuvo un añu enante nos acontecimientos asocedíos n’Alemania y Austria. “Enantes Viena que Berlín”, yera una de les frases más repetíes polos dirixentes obreros de la época, en referencia a la resistencia de los trabayadores austriacos en febreru del 1934 énte l’ascensu d’un réxime fascista nel país austriacu. La entrada de la CEDA al Gobiernu de la República foi lo que prendió la mecha revolucionaria nel Estáu español n’ochobre d’esi mesmu añu.

Más de 1.500 muertos

Una de les notes más negatives de la Revolución d’ochobre del 34 foi la cifra importante de muertos y la represión posterior, que, sicasí, “nun se pue comparar a la qu’hubo tres la Guerra Civil”, apunta Zapico. Los estudiosos d’esti acontecimientu sitúen en 1.200 el númberu de civiles y revolucionarios que perdieron la vida, mentes qu’el númberu de militares, guardies civiles y guardies d’asaltu finaos taríen n’alredor de los 300.

Tamién son pa llamentar los importantes estrozos qu’hubo, sobre manera n’Uviéu, onde la quema de la biblioteca de la Universidá d’Uviéu llevó a la perda de documentos d’una importancia grande. Sicasí, Zapico considera que nun ta probao qu’esti socesu fora provocáu polos revolucionarios, abriendo la posibilidá de que los ataques de les tropes republicanes provocara ésti y otros estrozos.

El diariu madrilanu ‘ABC’ dedica na so páxina web un especial sobre la revolución asturiana con delles semeyes procedentes del so bayorosu archivu fotográficu.

Semeya: Trabayadores deteníos na Revolución d'Ochobre.

Contador Estadistiques