La visita de los reis d’España fai más reivindicativu’l Día de la Nación Asturiana

Esti sábadu, 8 de setiembre, celébrase de manera oficial el Día de la Nación Asturiana. La conmemoración del triple centenariu de Cuadonga marca la xornada esti 2018, na que la visita de los monarques españoles fáenla entá más reivindicativa, con protestes en Cangues d'Onís y una marcha previa dende Les Arriondes.

Esti añu cúmplense 1.300 años del orixe del Reinu d'Asturies, amás del primer centenariu de la coronación canónica de la Santina y de la creación del Parque Nacional de la Montaña de Covadonga, actualmente Picos de Europa, una efémeride que ta llevantando polémica pol tratamientu dau dende les instituciones asturianes, con un sesgu ideolóxicu nidiu al colocar en Cuadonga el niciu del actual Reino de España. A ello súmase la presencia de los reis d'España, acompañada de les dos sos fíes no que va ser la primer visita de Leonor, princesa de Asturias, al país.

L’asistencia de la familia real a Cuadonga provoca que la celebración del Día de la Nación Asturiana sía la más reivindicativa de los años últimos. #LluchandoPolaSoberanía, que venía celebrando una marcha per Uviéu coincidiendo col 8 de setiembre, tresllada esti añu la mesma a Cangues d’Onís baxo’l lema ‘Asturies nun tien rei. Soberanía y República’, que cuenta col sofitu d’unes venti organizaciones polítiques, sindicatos y coleutivos.

Asina, Andecha Astur, Izquierda Asturiana (IAS) y el Partido Comunista de Asturias anunciaron el so apoyu y presencia na marcha con salida en Les Arriondes (11 hores) y posterior concentración en Cangues (13 hores) xunto a la Corriente Sindical d’Izquierda (CSI), Darréu, Mocedá Comunista d’Asturies, Xunta Estudiantil Asturiana, Federación Asturiana Memoria y República (Famyr), Fondu xUnitariu de Solidaridá Obrera d’Asturies (FUSOA), Asturies Laica, Les Violetes, Bloque Críticu, Asturies Rebelde, Bujarra, Espaciu La Llegra, CSOA La Llume, Cambalache, Llar El Mataderu y Sestaferia. “Esti 8 setiembre convocamos a toles asturianes y asturianos que comparten los valores del republicanismu y el refugu a la monarquía, defendendo un modelu social meyor p'Asturies, nos que la soberanía popular y la xusticia social seyan pegollos d'una Asturies con futuru”, apunten dende #LluchandoPolaSoberanía.

La organización entama trés autocares con salida de Mieres, La Felguera y Avilés, con paraes peles principales villes del país, a los qu’hai que sumar a la xente del oriente y les munches persones que van desplazase en vehículos particulares. Finalmente la Delegación del Gobiernu estatal n’Asturies nun permite facer la marcha pel arcén de la carretera, polo qu’ésta va dir pela sienda que xune Les Arriondes y Cangues.

Podemos

La Folixa Popular que Podemos venía celebrando pol Día d’Asturies nel Muséu del Pueblu d’Asturies va pasar esti añu a los terrenos lliberaos pol Plan de Víes, bautizáu polos xixoneses como’l Solarón. Una Nueche en Danza con Xeitu y Cantaruxare va servir d’avance esta nueche (21 hores), anque va haber actividá nel llugar dende les 17 hores.

Mañana, dende’l meudía, van entamase talleres y meses redondes, destacando l’actu políticu previstu a les 18.30 hores con Iñigo Errejón, diputáu de Xuníos Podemos; Noelia Vera, covocera de Xuníos Podemos nel Congresu; Xulio Ferreiro, alcalde d’A Coruña; la francesa Martine Billard, ex copresidenta del Parti de Gauche y coordinadora d’Ecoloxía de La France Insoumise; y los asturianos Daniel Ripa, Yolanda Huergo y Mario del Fueyo. Darréu va comenzar el Folixa Fest con Jerónimo Granda (19.30 hores), Tremenda Jauría (20.45 hores), Dixebra (22 hores) y DJ Populismo (00 hores).

Izquierda Xunida

El Muséu del Pueblu d’Asturies ye’l llugar escoyíu por Izquierda Xunida pa entamar los sos actos pol Día d’Asturies. El comienzu ta previstu pa les 12.30 hores, col eventu ‘Asturias por la izquierda’ a les 13 hores como’l principal: un alderique de la periodista Xana Iglesias col escritor Xuan Bello y la diputada Concha Masa “sobre un futuru de progresu n’Asturies pa la mayoría social y trabayadora’.

Conciertos, una espicha popular, xuegos tradicionales y una presentación sobre la Wikipedia n’asturianu a cargu de Víctor Suárez (18 hores) van completar les actividaes, que van finar tres l’actuación de Spanta la Xente a les 19 hores.

Partíu Asturianista

Tres presentar el miércoles el llibru que resume los sos 30 años d’historia, el Partíu Asturianista (PAS) va celebrar el Día de la Nación Asturiana cola so tradicional xinta de xeremendía ente militantes y simpatizantes n'El Pinal que va tener llugar el domingu.

Actos oficiales del Gobiernu en Casu

Casu acueye esti añu la celebración oficial pol Día d’Asturies tres el sofitu de la Xunta Xeneral d’una proposición non de llei d'IX pa compensar d'esta manera a la población del conceyu polos inconvenientes que-yos provocó'l gran argayu que se produxo'l 22 de marzu y qu'aislló la zona per meses per carretera. Asina dende esta tarde y hasta’l domingu va haber actividaes, destacando los conciertos d’Anabel Santiago (güei), Rodrigo Cuevas (mañana) y Petit Pop (domingu).

El Coru Mineru de Turón, Luis Núñez y los Folganzanes y la tonada a cargu de l'Asociación d'Intérpretes de Canción Asturianu (AICA) y l'Asociación del Canción y el Folclor Valle del Nalón, completen la ufierta musical del programa xunto col Grupu Folclóricu Blimea y la Banda de Gaites Garulla, qu'amás van animar Casu con pasucáis mientres los dos díes. El sábadu va haber teatru de cai itinerante col montaxe de Carlos Alba ‘Llázaro de Tormes’, Premiu Nel Amaro, y cine nel Centru d'Interpretación del Parque Natural de Redes, cola programación de Cien díes de soledá.

El Mercáu tradicional y la Feria de productos asturianos van tar allugaos na Plaza del Conceyu y na Plaza del Mercáu, ente otres munches actividaes d’un programa completu que pue consultar nel documentu axuntu a esta noticia.