Los X Alcuentros Astur-Cántabros van tener como sede Marina de Cuyedo

La población de Marina de Cuyedo releva a Cangues d’Onís como sede de los Alcuentros Astur-Cántabros, que van desendolcase del vienres al domingu. Esti eventu echó a andar hai una década en Ribeseya como un intercambiu cultural ente dambos territorios.

La Sociedá Etnográfica de Ribeseya foi la entidá qu’impulsó esta celebración, que yá pasó per Colombres, San Xuan, Panes y Cangues, n’Asturies, y San Vicente de la Barquera, Cabezón del Sal, Reocín y Valderredible, en Cantabria. Asina, nun ambiente folixeru, produzse un intercambiu cultura, gastronómicu, deportivu y artísticu, con un programa ampliu d’actividaes pa potenciar les rellaiciones ente asturianos y cántabros.

Un gran panel nel que se pueden ver los mapes d’Asturies y Cantabria preside dende hai unos díes el llugar onde va desendolcase l’alcuentru. Éstos van principiar mañana, a les 18 hores, cola apertura del Mercáu Astur-Cántabru, que’l sábadu va tener actividá dende les 11.

A les 11.15 hores va haber un hermanamientu de cofradíes gastronómiques, tando previsto l’actu institucional pa les 13.30 hores. Una hora depués va haber una xinta popular, mentes qu’a les 17 hores va comenzar un festival de música y folclor nel que van tar presentes les agrupaciones asturianes Sabugo Tente Firme y Xaréu d’Ochobre, y na que va haber una amuesa de tonada.

Festival Intercélticu

Pa la nueche, dende les 21.30 hores, ta programáu un Festival Intercélticu nel que van participar Megrada Tradicional, los portugueses Malandum Malandaina y Corquiéu. L’actuación de los rioseyanos ta prevista pa la medianueche.

El domingu va haber tamién actividá nel Mercáu Astur-Cántabru dende les 11 hores hasta les 19.30 hores, momentu nel que va finar l’Alcuentru. Mentes el día va haber una amuesa de deportes tradicionales (12 hores) y actividades pa neñes y neños pela tarde, ente otros.