Los parragueses Llamedo y Vázquez devuelven el Seya a Asturies

En K-1 la victoria foi compartida al llegar Estomba y Fidalgo al mesmu tiempu.

Dende 1996, col trunfu d'Alberto Llera y Monchu Cerra, nun había un K-2 asturianu dafechu que se xubiera nos más alto de podiu del Descensu Internacional del Seya, dinámica que frayaron el sábadu en Ribeseya Milín Llamedo y Pedro Vázquez. Los de Parres, que nun se decidieron a participar hasta la tarde del martes por cuenta de la orde federativa qu'impidía la inscripción de piragües conformaes por palistes de diferentes nacionalidaes, cuando Llamedo taba preparando la competición col arxentín Franco Balboa, vencieron nel sprint final d'un Seya marcáu pola emoción.

Hasta cuatro embarcaciones llegaron al final con opciones de trunfu, siendo sólo una la qu'apostara pol portéu en La Boticaria, la de los cántabros Julio Martínez y Rubén González, que finaron segundos. El tercer puestu foi pa los sudafricanos Andrew Birkett y Hank McGregor, mentes que los asturianos Luis Amado y Miguel Llorens, finaron cuartos.

Primer vegada na historia

El vascu Borja Estomba y el lleonés Guillermo Fidalgo protagonizaron la primer victoria compartida del Seya. Dambos marcaron el mesmu tiempu, polo que la organización decidió conceder el títulu de ganador a dambos.

En categoría femenina, el trunfu en K-2 foi pa la zamorana Eva Barrios y la navarra Amaia Osaba, mentes qu'en K-1 llevólu la conquense Arantza Toledo.