“La UABRA ye un eventu yá consolidáu”, afirma Cristina Valdés

El llunes comienza en Cangas del Narcea la novena edición de la Universidá Asturiana de Branu (UABRA) qu’entama l’Academia de la Llingua Asturiana (ALLA). “Ye un eventu yá consolidáu”, espresa la direutora María Cristina Valdés, como amuesa l'alta matriculación.

Más d’un centenar d’alumnes y alumnos van participar na UABRA ente’l llunes y el 10 d’agostu, a lo qu’hai que sumar otru mediu centenar de docentes que van poner clase na amplia ufierta de los cursos, que tamién son d’estensión universitaria gracies a la collaboración de la Universidá d’Uviéu. L’ALLA, pal so desendolcu, tamién cuenta col fundamental sofitu del Conceyu de Cangas del Narcea.

“Trátase d’una ufierta formativa abierta a cualquier persona que forma en llingua y que cuenta con cursos d’afondamientu cultural que suponen una mayor especialización por parte del profesoráu”, esplica Valdés, direutora de la UABRA dende’l 2015, cuando sustituyó a Xosé Antón González Riaño. “Ye un eventu consolidáu que cuenta con un valor fundamental: una ufierta cultural”, añade.

Asina destaca les actividaes paraleles a los cursos, con esposición, conciertos y charres “con conferenciantes de nivel que sirven pa fomentar el debate n’asturianu”. Les ponencies previstes esti añu nel salón d’actos de la Escuela-Hogar (19 hores) son ‘Desarrollu rural n’Asturies’ (martes), a cargu de Marcos Niño, alcalde de Santalla d’Ozcos; ‘El cine na normalización social del asturianu’ (xueves 2), pol realizador Pablo A. Quiroga; ‘Llingua Asturiana y RTPA’ (martes 7), del periodista Damián Barreiro; y ‘Turismu n’Asturies: el valir de la Llingua’ (xueves 9), desendolcada pol escritor, periodista y presidente d’Iniciativa pol Asturianu, Inaciu Galán.

La estaya musical, col Teatru Toreno como sede (22.30 hores) va protagonizala Carlos Rubiera (miércoles) y la Orquesta Céltica Asturiana (miércoles 8), que podría ser al aire llibre nel casu de bon tiempu. Mentes, el Palaciu d’Omaña va acoyer la esposición ‘Día de les Lletres asturianes: El llargu camín de la oficialidá’ del llunes al vienres 10 d’agostu, cola inauguración oficial prevista pa les 13.30 hores.

Los cursos

Como ye vezu dende los cursos d’Ibias, l’ALLA va ufrir el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que consten de 60 hores llectives. A ellos súmase’l ‘Cursu de Gallego-asturiano (segunda fase)’, con 40 hores llectives na primer selmana de la UABRA.

La ufierta complétase colos cuatro ‘Cursos d’Afondamientu Cultural y Llingüísticos’. Na primer selmana van impartise ‘Capacitación pa la traducción al asturianu’ baxo la direición de Marta Mori y con profesores como la propia Valdés, Alberto Fernández Costales y Héctor García Gil, y ‘Competencies dixitales na Educación’, supervisáu por David Melendi y col apoyu de Xulio Berros y Fernando de la Fuente, direutor d’Asturies.com.

‘Xestión cultural n’Asturies: creando cultura a traviés de los medios’, coordináu por Isabel Hevia con un profesoráu formáu por Cristóbal Ruitiña Testa, María Xosé Rodríguez López y Inaciu Galán, y ‘Asturies ente’l sieglu XX y XXI: tresformaciones sociales y culturales’, dirixíu por Rubén Vega y con un equipu conformáu por Marta Mori, Xune Elipe, Ana Vanessa Gutiérrez, Rafael Rodríguez Valdés, Faustino Zapico Álvarez y Marcos Rodríguez Alonso, son los correspondientes a la segunda selmana. Los cuatro formen parte de los ‘Cursos d’Estensión Universitaria’ colos qu’estudiantes universitarios van poder algamar 5 o 6 creitos de llibre configuración.

Padilla, na inauguración

La inauguración de los cursos va celebrase’l llunes, a les 13 hores, nel salón d’actos del Palaciu d’Omaña, actu nel que nun va tar presente Valdés al tener compromisos en Madrid como direutora xeneral d’Universidaes y Investigación. La mesa va tar compuesta por Fernando Padilla, direutor xeneral de Planificación Llingüística y Normalización; González Riaño, presidente de l’ALLA; Francisco José Borge, vicerrector d’Estensión Universitaria y Proyeición Internacional de la Universidá d’Uviéu; Laura Álvarez García, teniente d’alcalde de Cangas.

Na semeya, un momentu d'una clase na edición del añu pasáu de la UABRA.