La UABRA prepara la edición d’esti añu

Esti vienres ye’l día caberu pa formalizar la matrícula pa la novena edición de la Universidá Asturiana de Branu (UABRA) qu’entama l’Academia de la Llingua Asturiana (ALLA) en Cangas del Narcea. Ésta va desendolcase del 30 de xunetu al 10 d’agostu.

La tamién direutora xeneral d’Universidaes y Investigación, María Cristina Valdés, dirixe un añu más la UABRA col sofitu de Xosé Ramón Iglesias Cueva y Pablo Xuan Manzano como secretariu y direutor xeneral de los cursos, de manera respeutiva. La Universidá d'Uviéu y el Conceyu de Cangas del Narcea collaboren xunto cola ALLA nel entamu d'esta actividá que tien la Casa-Hogar de Cangas como sede d’agospiu y la Escuela Oficial d’Idiomes, de les clases.

Como ye vezu dende los cursos d’Ibias, l’ALLA va ufrir el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tienen un costu de 300 euros, cantidá qu’inclúi los materiales y la pensión completa na Escuela-Hogar de Cangas, y que consten de 60 hores llectives. A ellos súmase’l ‘Cursu de Gallego-asturiano (segunda fase)’, con 40 hores llectives na primer selmana de la UABRA.

La ufierta complétase colos cuatro ‘Cursos d’Afondamientu Cultural y Llingüísticos’. Na primer selmana van impartise ‘Capacitación pa la traducción al asturianu’ baxo la direición de Marta Mori y con profesores como la propia Valdés, Alberto Fernández Costales y Héctor García Gil, y ‘Competencies dixitales na Educación’, supervisáu por David Melendi y col apoyu de Xulio Berros y Fernando de la Fuente, direutor d’Asturies.com.

‘Xestión cultural n’Asturies: creando cultura a traviés de los medios’, coordináu por Isabel Hevia con un profesoráu formáu por Cristóbal Ruitiña Testa, María Xosé Rodríguez López y Inaciu Galán, y ‘Asturies ente’l sieglu XX y XXI: tresformaciones sociales y culturales’, dirixíu por Rubén Vega y con un equipu conformáu por Marta Mori, Xune Elipe, Ana Vanessa Gutiérrez, Rafael Rodríguez Valdés, Faustino Zapico Álvarez y Marcos Rodríguez Alonso, son los correspondientes a la segunda selmana. La matrícula pa estos cursos, de 35 hores llectives, ye tamién de 190 euros, con too incluyío.

Cursos d'Estensión Universitaria

Tamién van entamase ‘Cursos d’Estensión Universitaria’, en collaboración cola Universidá d’Uviéu, colos qu’estudiantes universitarios van poder algamar 5 o 6 creitos de llibre configuración. La ufierta nesta propuesta nesta estaya ye la siguiente: ‘Cursu Elemental de Llingua Asturiana’ y ‘Cursu Avanzáu de Llingua Asturiana’, de 40 hores llectives; ‘Capacitación pa la traducción al asturianu’, ‘Competencies dixitales na Educación’,  ‘Xestión cultural n’Asturies: creando cultura a traviés de los medios’ y ‘Asturies ente’l sieglu XX y XXI: tresformaciones sociales y culturales’, de 35 hores llectives.

El día caberu pa inscribise pa la UABRA ye esti vienres, siendo l’horariu pa formalizar la matrícula na sede de l’ALLA (L’Águila 10, Uviéu)  –pa lo que ye necesario abonar l’importe y llevar una semeya– el siguiente: de llunes a xueves, de 9 a 15 hores y de 16 a 19 hores; y de 9 a 14 hores, el vienres. Por mor de la demanda alta que tienen estos cursos, la institución va respetar l’orde d’inscripción.

Actividaes complementaries

Amás de l’actividá académica, la UABRA entama una serie de conferencies, conciertos y una esposición que pueden disfrutar tanto los estudiantes como los cangueses. Les ponencies previstes nel salón d’actos de la Escuela-Hogar (19 hores) son ‘Desarrollu rural n’Asturies’ (martes 31), a cargu de Marcos Niño, alcalde de Santalla d’Ozcos; ‘El cine na normalización social del asturianu’ (xueves 2), pol realizador Pablo A. Quiroga; ‘Llingua Asturiana y RTPA’ (martes 7), del periodista Damián Barreiro; y ‘Turismu n’Asturies: el valir de la Llingua’ (xueves 9), desendolcada pol escritor, periodista y presidente d’Iniciativa pol Asturianu, Inaciu Galán.

La estaya musical, col Teatru Toreno como sede (22.30 hores)  va protagonizala Carlos Rubiera (miércoles 1) y la Orquesta Céltica Asturiana (miércoles 8). Mentes, el Palaciu d’Omaña va acoyer una esposición del llunes 30 de xunetu al vienres 10 d’agostu.

Na semeya, Escuela-Hogar de Cangas del Narcea mientres la edición del 2017.