José Manuel Tejedor estrénase en solitariu col discu ‘Miraes’

Tres toda una carrera musical xunto colos sos dos hermanos en Tejedor, Javier y Eva, José Manuel Tejedor ta acabante d’asoleyar el so primer discu en solitariu, ‘Miraes’. El gaiteru va presentar esti trabayu con un conciertu na Casa Municipal de Cultura d’Avilés.

Esti discu ta compuestu por 15 pieces de calter intimista nel que les flautes, los teclaos y les guitarres amiéstense col soníu de la gaita asturiana. “Quería moveme nun nuevu espaciu sonoru. Ye un discu minimalista, llargu y con munchos detalles, pa escuchar tranquilamente”, esplica José Manuel, que’l sábadu tocó con Tejedor en Ribeseya, banda que sigue activa.

Pa la presentación de los temes en direuto de ‘Miraes’ el gaiteru escoyó’l so llar, Avilés. Asina, mañana a les 20.30 hores, l’auditoriu de la Casa Municipal de Cultura de la villa va acoyer el conciertu de presentación del discu, nel que José Manuel va tar acompañáu por Juan Yagüe (guitarra), Juanjo Díaz (percusión) y Richard García (tecláu), coproductor tamién del discu col propiu Tejedor.

El preciu del espectáculu ye 16 euros. Les entraes pueden mercase de manera anticipada na plataforma de venta de Liberbank.