José Manuel Tejedor sustitúi a Felpeyu nel conciertu de la XV 'Semana Solidaria'

Celébrase en Mieres del martes al sábadu, cuando ta prevista l'actuación del gaiteru.

La Fundación Juan Soñador entama la decimoquinta edición de la 'Semana Solidaria', que nesta ocasión lleva'l nome de 'El desarrollo en tus manos' y ta dedicada a los Oxetivos de Desarrollu Sostenible (ODS) que nel añu 2015 llanzó la Organización de Naciones Xuníes (ONX) como marcu nuevu pa la cooperación y el desarrollu. "Esti añu abordaremos los ODS pa poder entender meyor l'axenda global nueva de la ONX pa consiguir un futuru onde toos disfrutemos d'unes condiciones de vida dignes".

Una conferencia, dos alderiques y la proyeición de 'Diamante de sangre' na Casa Cultura Teodoro Cuesta son los conteníos d'esta iniciativa que tamién inclúi una esposición que se pue visitar dende güei y hasta'l día 16, en collaboración cola ONGD Jóvenes y Desarrollo, col títulu 'Objetivos de Desarrollo Sostenible. 17 Objetivos para Cambiar Nuestro Mundo'. Un conciertu va poner el ramu a la 'Semana Solidaria' el sábadu a les 19.30 hores, pal que taba previstu nun primer momentu Felpeyu, que finalmente anunció que nun van poder tocar.

El so sustitutu va ser José Manuel Tejedor, que va llevar a Mieres los cantares del so discu 'Miraes'. Ésti ye'l primer trabayu en solitariu del avilesín, formáu por 15 cantares de calter intimista nel que les flautes, los teclaos y les guitarres amiéstense col soníu de la gaita asturiana.