Carapaz lleva la Vuelta a Asturies tres exhibise nel Altu L'Acebu

El ciclista ecuatorianu de 24 años del Movistar estrena'l so palmarés como profesional con una etapa y la xeneral de la ronda asturiana.

La etapa reina, la que xunía Soto Ribera col Altu L'Acebu, foi la que, como s'esperaba, marcó la carrera. Una ataque a falta de seis quilómetros pa la cima llevó a Richard Carapaz a confirmase como una de les mayores promeses del ciclismu actual.

Debutante nuna carrera de trés selmanes l'añu pasáu, finando nun meritoriu trentenu sestu puestu en La Vuelta, va tomar la salida nel Giro esti vienres tres algamar el so primer gran trunfu como profesional. Nun tuvo a naide que lu siguiere nes cuestes de L'Acebu y el domingu namái tuvo que defender los 40 segundos de ventaya que tenía sobre'l so compatriota Jonathan Caicedo (Medellín Benros), que'l día anterior vía como nel metru últimu de la etapa con final en La Pola Ḷḷena yera superáu pol rusu Dmitry Strakhov (Lokosphinx) cuando yá llevanta los brazos a mou de victoria nun escesu de confianza.

La tercer etapa, cabera de la LXI Vuelta a Asturies, con salida de Cangas del Narcea y llegada na cai Uría d'Uviéu, foi pal portugués Ricardo Mestre (W52-Porto). Completaron el podiu de la xeneral precisamente Caicedo, como segundu, y Mestre, como terceru.

Semeya propiedá del Movistar Team.