El II Congresu Mundial sobre Destinos Turísticos Intelixentes d'Uviéu retrásase una selmana

Va celebrase finalmente del 25 al 27 de xunu y incorpora nos dos díes previos un alcuentru de programadores.

El Gobiernu d'Asturies, el Ministeriu d'Enerxía, Turismu y Axenda Dixital, y la Organización Mundial de Turismu (OMT) tán acabantes de concovar el II Congresu Mundial de Destinos Turísticos Intelixentes, previstu nun primer momentu pa ente'l 18 y 20 d'esi mesmu mes, que se celebra nel país con motivu del triple centenariu de Cuadonga. La convención va centrase nos modelos nuevos del sector, basaos nos principios de gobernanza, innovación, teunoloxía, sostenibilidá y accesibilidá, y tien dende ayeri abierta la convocatoria.

Mientres los trés díes que dura l'eventu con sede nel Eurostars Hotel de La Reconquista d’Uviéu, ciudá que toma’l relevu de Murcia, espertos de tol mundu van debatir sobre les oportunidaes y desafíos nesti ámbitu, que surden del desenvolvimientu y la xestión de productos y servicios innovadores basaos en soluciones teunolóxiques nueves. “Asturies apostó siempre por un modelu sostenible, por eso abrimos les nuestres puertes a esti congresu, nel que los profesionales van poner la innovación al serviciu del desenvolvimientu turísticu intelixente y responsable”, señaló'l conseyeru d'Emplegu, Industria y Turismu, Isaac Pola.

El congresu va incluyir ponencies maxistrales y meses redondes nes que se va aldericar sobre les tendencies dixitales más relevantes como la intelixencia de datos, la intelixencia artificial y el deprendimientu automáticu, l'internet de les coses, la llocalización intelixente, los servicios na nube, la teunoloxía de la cadena de bloques y la realidá virtual y aumentada. Tamién se van analizar el tresformamientu dixital dientro de los destinos, les soluciones teunolóxiques pa midir l'impautu turísticu, la gobernanza nos destinos intelixentes, la importancia de les teunoloxíes nueves nel desenvolvimientu sostenible y el papel de les plataformes abiertes y la xestión de datos p'ameyorar la competitividá.

Una de les novedaes d'esta edición ye la celebración previa al congresu del primer 'hackathon' o alcuentru de programadores pa destinos intelixentes, los díes 23 y 24. Esta iniciativa, que persigue'l desenvolvimientu de soluciones intelixentes pa impulsar la sostenibilidá del turismu, va divulgase en redes sociales mediante la etiqueta #Hack4SD.