El II Congresu Mundial sobre Destinos Turísticos Intelixentes va celebrase n’Asturies nel mes de xunu

El ministru d’Enerxía, Turismu y Axenda Dixital, Álvaro Nadal, anunció la celebración del II Congresu Mundial sobre Destinos Turísticos Intelixentes n’Uviéu nel mes de xunu. La organización vien pola celebración del triple centenariu de Cuadonga.

El congresu tiene el so orixe nel proyeutu de Destinos Turísticos Intelixentes, impulsáu pola Secretaría d’Estáu de Turismu y xestionáu pola Sociedá Estatal pa la Xestión de la Innovación y les Teunoloxíes Turístiques (Segittur). Va dirixíu a territorios con una ufierta turística enfocada a la tresformación dixital d’esta actividá, asina como a la meyora de la so eficiencia al traviés del usu de las Teunoloxíes de la Información y la Comunicación (TIC) pa crear servicios diferenciales y competitivos.

Tanto’l conseyeru d’Emplegu, Industria y Turismu, Isaac Pola, como’l ministru destacaron la importancia d’estes teunoloxíes, que tán suponiendo una revolución na cultura de los viaxes y camudando los modelos de negociu tradicional. La celebración d’esti simposiu, al qu’asistirán más de 500 profesionales procedentes d’una ventena d’estaos, contribuirá a la promoción internacional d’Asturies al traviés de la so difusión en medios de comunicación y redes sociales, destacaron dende’l Gobiernu.

Nel congresu analizaráse la importancia del modelu de desarrollu pol qu’apuesten los destinos turísticos intelixentes, basáu en cinco exes d’actuación: innovación, teunoloxía, accesibilidá, sostenibilidá y gobernanza. La so sede va ser l'Eurostars Hotel de La Reconquista d’Uviéu, ciudá que toma’l relevu de Murcia, ente los díes 18 y 20 de xunu.

Triple centenariu

Esta iniciativa forma parte de los actos que van celebrase nel país esti añu con motivu de la celebración del triple centenariu de Cuadonga: primer centenariu de la coronación canónica de la Santina y de la creación del Parque Nacional de la Montaña de Covadonga, actualmente Picos d’Europa, y el decimotercer centenariu de los oríxenes del Reinu d’Asturies.

Na semeya, Nadal y Pola. Obra d'Armando Álvarez.