Noreña mete en Rexistru la ordenanza nueva d’asturianu pa salvar l’anulación de l’anterior por parte del TSXA

Independientes por Noreña (IPÑ), Conceyu Abiertu por Noreña, Izquierda Xunida (IX) y Foro metieron en Rexistru la ‘Ordenanza Municipal pal Usu de la Llingua Asturiana nel Conceyu de Noreña’ cola intención de llevala al Plenu de marzu o abril. Ésta presenta unes poques modificaciones con respeuto a l’anulada pol TSXA.

L’abogáu Ignacio Fernández encargóse de redautar estos cambios “pa evitar intepretaciones llibres”, esplica Antonio Martínez Fernández, edil de Conceyu Abiertu por Noreña, formación qu’impulsó la ordenanza nel conceyu, que cuenta col sofitu del equipu de gobiernu municipal. Les modificaciones danse principalmente nel preámbulu del documentu, yá que la sentencia del Tribunal Superior de Xusticia d’Asturies (TSXA) basaba la so decisión na referencia al asturianu como llingua propia del conceyu na mesma, lo qu’entendía una declaración d’oficialidá.

El testu nuevu incorpora por ello’l testu siguiente: “la presente ordenanza en nengún casu implica una declaración d’oficialidá o cooficialidá de la llingua asturiana nel conceyu de Noreña, sinón qu’únicamente constitúi la regulación mediante la que’l Ayuntamientu de Noreña pretende dar cumplimientu a la previsión del artículu 8.1 de la Llei 1/1998, del 23 de marzu, d’Usu y Promoción del Bable/Asturianu”. Tamién se modifica, ente otros, l’artículu 1, que dicía que “la llingua asturiana o asturianu ye, col castellanu, la llingua propia del conceyu de Noreña…” elimando la referencia a la llingua castellana, una decisión que se toma “porque, pese a que la intención que teníemos cuando lo redautamos yera lo contrario, nun facer de menos al castellanu, podría dar a pensar nuna equiparación”, comenta Martínez Fernández.

Informe económicu

Tres la presentación ayeri de la ordenanza nel Rexistru, coincidiendo col Día Internacional de la Llingua Materna, el siguiente pasu ye incorporar l’informe económicu d’Intervención, la segunda razón que llevo a l’anulación del documentu. L’equipu de gobiernu comandáu por Amparo Antuña tamién quixo encargar otru informe a Secretaría, pa nun dexar cabu sueltu nengún, lo que podría retrasar el treslláu a Plenu pa la so aprobación definitiva a abril.

Dende Conceyu Abiertu por Noreña destaquen la rápidez cola que se reaicionó ente l’anulación, que ye efeutiva dende’l día 13. “Esiste un avance social y políticu de compromisu pa cola llingua en Noreña”, destaca Martínez Fernández, qu’espera que’l PSOE camude la so postura –votó en contra de la ordenanza nel 2016– “pa sumar, ensin zarrar les puertes al PP”.

Na semeya, Antuña y Pelayo Suárez Colunga (IPÑ), Beatriz Corzo (Foro), René Coviella (IX) y Martínez Fernández (Conceyu Abiertu por Noreña).