Celébrase’l Día Internacional de la Llingua Materna, xornada que gana puxu añu a añu

Son munchos los eventos entamaos estos díes n’Asturies por mor del Día Internacional de la Llingua Materna, celebración que se conmemora tolos 21 de febreru. Esta xornada vien ganando puxu nel país nos años últimos, con actividaes tanto a nivel escolar como pa la ciudadanía entamaes dende'l Gobiernu y los conceyos.

La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistaní –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.

‘La diversidá llingüística y el plurillingüismu como elementos clave pa la sostenibilidá y la paz’ ye’l lema escoyíu esta ocasión pol organismu internacional, qu’entama actividaes en dellos puntos del planeta, con un actu central en París consistente nun alderique baxo’l nome ‘Nueses llingües, nuesos bienes’. Audrey Azoulay, direutora xeneral de la UNESCO, afirma nun mensaxe por mor d’esta xornada que “sofita les polítiques llingüístiques que ponen de relieve les llingües maternes y autóctones, sobre manera nos países plurillingües” y convida a tolos estaos miembros “a celebrar con toda clase d’iniciatives, educatives y culturales, la diversidá llingüística y el multillingüismu, que constitúin la riqueza viva del nuesu mundu”.

Actividaes institucionales en Samartín y Avilés

El Gobiernu, al traviés de la Conseyería d’Educación y Cultura, entama, como ye vezu, dellos actos pa celebrar el Día de la Llingua Materna, con sede esti añu en Samartín del Rei Aurelio y Avilés. En L’Entregu, nel Teatru Municipal, los alumnos del IES Virgen de Covadonga y el Colegio Sagrada Familia participen nun eventu que consiste na llectura del manifiestu pola llingua asturiana y el gallego-asturiano –que va repetise nos recreos de les escueles de tol país–, na presentación del videu ‘Cocinando llingua materna’ y na actuación de Luis Núñez y Los Folganzanes, formación ganadora del X Premiu al Meyor Cantar gracies al tema ‘La ñeve y la esmeralda’. Tanto l’alcalde, Enrique Fernández Rodríguez, como’l direutor de Planificación Llinguística y Normalización, Fernando Padilla, asisten al mesmu.

Yá pa tolos públicos, va celebrase esta tarde na Casa Cultura d’Avilés, a partir de les 20.30 hores, un conciertu del tenor Joaquín Pixán, acompañáu al pianu por Mario Bernardo, na que van interpretase una escoyeta de pieces del so discu ‘Un cancionero asturiano para el siglo XXI’, con testos adautaos por Antonio Gamoneda. L’alcadesa Mariví Monteserín y el conseyeru Genaro Alonso van facer una intervención enantes del comienzu de l’actuación.

Esta celebración oficial, sicasí, yá comenzó ayeri en Nava, con un actu pa escolines y escolinos de Primaria, na que se representó la obra ‘Llázaro de Tormes’, de Carlos Alba ‘Cellero’. Otra manera, Samartín del Rei Aurelio entama pol Día Internacional de la Llingua Materna  una programación propia a lo llargo de tola selmana, que güei va centrase nun especial organizáu por Radio San Martín con comienzu a les de 18.30 hores y final a les 22.

Llectura d’un manifiestu nos centros

Coincidiendo con esta xornada, la Conseyería d’Educación y Cultura propón la llectura d’un manifiestu nos centros educativos que cuenta tanto con versión n’asturianu como en gallego-asturiano. D’igual forma, yá de manera individual, la gran mayoría escueles y institutos van entamar actividaes venceyaes cola llingua materna.

Amás, son munchos los conceyos qu’aprovechen la xornada pa presentar actividaes o entregar gallardones. En Xixón celebren el Día Internacional de la Llingua Materna baxo’l lema ‘Desatapa l’asturianu, descubri la diversidá’ y entama un actu a les 18 hores nel salón de recepciones de la Casa Conceyu onde van entregase los premios a los ganadores del primer concursu de rellatos curtios ‘Qué guapo ye querese’.

Alba Carballo, con 'Desnudu nel sable', venció na categoría de 19 a 25 años, quedando Claudia Gutiérrez Lueje, con 'El dolor caltria', y Borja Riestra, con 'La entruga', sesgunda y terceru. Mentes, na estaya de 16 a 18 años, el ganador foi Pablo Cueto con 'L'amor tamién madruga', quedando segundu Daniel Fernández Rodríguez, con 'Alborecer'.

Ana Monserrat López Moro, conceyala d’Educación y Cultura, y María Xosé Rodríguez López, responsable de la Oficina de Normalización Llingüística, van tar presentes nesta ceremenonia que va zarrar un llectura, musicada por Dani García de la Cuesta, en castellanu, alemán, árabe, aragonés, chinu, eusquera, francés, griegu, inglés, rumanu, rusu y asturianu. D’esta forma, el Conceyu quier “impulsar la diversidá llingüística y cultural y la educación multilingüe”, al empar que trata de crear una “mayor conciencia sobre les tradiciones del mundu y promover la solidaridá  basada na tolerancia y el diálogu”.

Ente les munches actividaes entamaes nel país pa esta xornada tamién destaca la entrega del I Premiu de Relatos Curtios Xosé Caveda y Nava, organizáu pol Conceyu de Villaviciosa, que llevó Francisco ‘Paco’ Álvarez. L’actu va celebrase a les 18.30 hores nel pisu segundu de la Casa de los Hevia y va contar tamién con una actuación poética de Susana Sela y Maxi Areñes.