Nava, Samartín del Rei Aurelio y Avilés acueyen les celebraciones oficiales pol Día Internacional de la Llingua Materna

|
Nava, Samartín del Rei Aurelio y Avilés acueyen les celebraciones oficiales pol Día Internacional de la Llingua Materna

Esti miércoles, 21 de febreru, ye’l Día Internacional de la Llingua Materna. Dende’l Gobiernu, pa festexar esta xornada, entámense conciertos y teatru en Nava, Samartín del Rei Aurelio y Avilés, y promueve la llectura d’un manifiestu en les escueles del país.

El lema escoyíu pola Conseyería d’Educación y Cultura esti añu ye ‘Caltener la diversidá llingüística y promover el plurillingüismu pa sofitar los Oxetivos de Desenvolvimientu Sostenible’, afitando que “les llingües locales tresmiten cultures, valores y conocimientos tradicionales que desempeñen un papel importante na promoción d’un futuru sostenible”. La primer de les actividaes va celebrase un día enantes, el martes, y va consistir nun actu pal alumnáu de Primaria de los centros públicos de Nava, nel que van poder disfrutar de la representación (11 hores, Casa Cultura Marta Portal) de ‘Llázaro de Tormes’, de Carlos Alba ‘Cellero’, obra ganadora del primer Premiu y Festival Nel Amaro de Teatru Profesional en Llingua Asturiana o Gallego-asturiano.

El miércoles, a la mesma hora, va tener llugar un actu nel Teatru Municipal de Samartín del Rei Aurelio, en L’Entregu, al que van asisitir los alumnos del IES Virgen de Covadonga y el Colegio Sagrada Familia, y que va contar cola presencia de Fernando Padilla, direutor de Planificación Llinguística y Normalización, y del alcalde Enrique Fernández Rodríguez. Esti eventu va consistir na llectura del manifiestu pola llingua asturiana y el gallego-asturiano –que va repetise nos recreos de les escueles del país–, na presentación del videu ‘Cocinando llingua materna’ y na actuación de Luis Núñez y Los Folganzanes, formación ganadora del X Premiu al Meyor Cantar gracies al tema ‘La ñeve y la esmeralda’.

De forma paralela, y fuera de los actos entamaos pol Gobiernu, Samartín cuenta tamién con una programación propia por mor del Día Internacional de la Llingua Materna, en collaboración con Radio San Martín, l’Academia de la Llingua Asturiana y Planificación y Normalización Llingüística. Asina, güei va entregar a los padres y madres de los escolinos d’Infantil de 0 a 3 años un exemplar del ‘Llibru del naciatu’.

Mañana, a les 18 hores na Casa de la Mocedá de Sotrondio, va proyeutase la película doblada al asturianu ‘El tercer home’ y el miércoles la llingua asturiana va protagonizar un especial, de 18.30 a 22 hores, en Radio San Martín. El xueves, mentes, va poder vese otra cinta nel nuesu idioma, nesti casu’l filme d’animación ‘Los viaxes de Gulliver’, a les 18 hores na Casona del Bravial, en Blimea.

Otra manera, dende’l Conceyu editáronse un millar de marcafueyes que recueye l’aniciu del primer poema n’asturianu conocíu, el ‘Pleitu ente Uviéu y Mérida por la posesión de las cenizas de Santa Olaya’ (1639), d’Antón de Marirreguera. La xente interesao en facese con una va poder atopales en los equipamientos culturales y sociales de Samartín.

Amás, escaniando los códigos QR impresos na mesma, va poder sentise una obra de teatru grabada pol ‘Grupo de Teatro Amateur La Pirámide. Mujeres con Tiempo Propio’ en Radio San Martín, entitulada ‘Vacaciones por la borda’, y el cantar ‘La ñeve y la esmeralda’ de Luis Núñez y Los Folganzanes.

Joaquín Pixán

L’actu abiertu al públicu con motivu del Día Internacional de la Llingua Materna va ser un conciertu del tenor Joaquín Pixán, acompañáu al pianu por Mario Bernardo, na que van interpretase una escoyeta de pieces del so discu ‘Un cancionero asturiano para el siglo XXI’, con testos adautaos por Antonio Gamoneda. Va ser el miércoles, na Casa Cultura d’Avilés, a les 20.30 hores.

Dende’l Conceyu d’Avilés tamién va entamase, per aciu la Estaya de la Llingua, cuatro sesiones de ‘Críocuentos’: el miércoles, a les 10 y a les 10.30 hores, na Escuela Infantil del Quirinal; y el xueves, a les 10 hores, na de La Madalena, y a les 11 hores, na de La Toba.

Contador Estadistiques