El seminariu sobre les ventayes de la oficialidá sí consigue axuntar a personalidaes de dellos ámbitos profesionales

Escritores como Xuan Bello, xuristes como José Manuel Pérez Fernández y investigadores como Isabel Hevia, ente otros profesionales de sonadía, van participar nel seminariu d’Iniciativa pol Asturianu sobre les ventayes de la oficialidá, a diferencia del qu’anunció’l PP y que quedó nuna simple charra politizada con Catalunya como exa. Va celebrase los díes 2 y 3 de marzu.

L’edificu históricu de la Universidá d’Uviéu va ser la sede del seminariu ‘Oficialidá, el camín constitucional de futuru pal asturianu’ col que la organización quier amosar a la sociedá asturiana “les motivaciones, consecuencies y beneficios que va traer la inclusión del estatuts d'oficialidá nel Estatutu d’autonomía”. El rector Santiago García Granda va encargase d’inaugurar la mesma, pa la que yá tán confirmaos espertos de dellos ámbitos profesionales.

Bello, Pérez Fernández y Hevia son sólo dalgunos de los nomes de prestixu que van participar nesti ciclu de ponencies con un programa ampliu, dividíu en dos xornaes –vienres de 16 a 20.30 hores y sábadu de 10 a 14 hores–, que va presentase la selmana próxima. "Cuntamos con una riestra de profesionales de luxu. Queremos ufrir a la sociedá tola información sobre lo muncho positivo que tien la oficialidá en tolos ámbitos: sistema educativu, creación de riqueza y empléu, drechos y llibertaes, etc.”, esplica Inaciu Galán, presidente d’Iniciativa pol Asturianu, que considera que’l seminariu "va sirvir pa valtar munchos prexuicios y poner en circulación muncha información positiva que nun se te dando a los asturianos".

L’ampliu sofitu ente personalidaes de la cultura y dellos ámbitos profesionales a estes xornaes contrasta col apoyu nulu que tuvo la qu’anunció con pompa’l Partido Popular (PP). El seminariu col que Mercedes Fernández quería dar a conocer los supuestos peligros de la cooficialidá quedó namái nuna charra politizada de nome ‘Asturiano, sí. Oficialidad, no’, baxo’l lema ‘Nos afecta a todos’, que moderó Carlos Cuesta, axuntu del direutor d’OK Diario, mediu dixital que difundió la noticia falsa sobre una llectura obligada en Secundaria sobre’l nacionalismu asturianu na inesistente materia de Cultura Asturiana, y periodista conocíu por formar parte grupu de comunicadores qu'apaecíen en televisiones madrilanes nacíes cola TDT nes qu’espoxigaben idees estremistes y preconstitucionales.

El PP namái pudo convocar pa dicha conferencia a Félix Fernández de Castro, doctor en Filoloxía y profesor de la Universidá d’Uviéu espertu nel español d’América; a Joaquín López, un padre que salió en dellos medios de comunicación de la llamada caverna mediática denunciando una supuesta discriminación llingüística n’Illes Balears que lu llevaron a abandonar la isla y afincase n’Asturies; y a Rafael Arenas, caderalgu de Derechu y ex presidente de Sociedad Civil Catalana. Los ponentes y Mercedes Fernández, que presentó l’actu, centráronse en falar del catalán, los nacionalismos y en repetir la ‘matraca’ de la derecha preconstitucional contra la pluralidá llingüística.

"Pidir la oficialidá nun ye más que pidir que se cumpla la Constitución n'Asturies. Hai un consensu social y políticu y ye'l momentu d'avanzar nesa dirección, buscando un modelu propiu p'Asturies. Con esti seminariu queremos aportar nesi llabor", espón Galán.

Abiertu al públicu

L’asistencia al seminariu ‘Oficialidá, el camín constitucional de futuru pal asturianu’ ye abierta al públicu, anque dende Iniciativa pol Asturianu recomienden inscribise previamente al traviés d'esti cuestionariu. Les persones que nun sía socies del coleutivu y quieran un diploma que certifique la so asistencia ha d’abonar 10 euros nel momentu de formalizar la matrícula.

Como pieslle del seminariu, va entamase una espicha. Ésta va celebrase na sidrería La Pumarada dende les 14.30 y tien un costu de 25 d’euros qu’ha de pagase nel momentu de la inscripción.