La XDLA critica’l tratamientu nos informativos de TPA a l’actualidá sobre temes llingüísticos

L’ausencia de TPA na rueda de prensa dada pola Academia de la Llingua Asturiana (ALLA) polos ataques al asturianu ye pa la Xunta pola Defensa de la Llingua Asturiana (XDLA) ún exemplu más del tratamientu parcial nos informativos a l’actualidá sobre temes llingüísticos. Acusa a la direición del ente de poner la canal al serviciu de los contrarios a la normalización.

“Mentes nel Llar de l'ALLA había micrófonos de los principales medios de comunicación del país, rescamplaba l'ausencia del de la televisión que pagamos toos y toes, que silenció la palabra de la principal institución llingüística asturiana”, critica’l coleutivu cívicu que recuerda cómo, namái un par de díes depués, ‘TPA Noticias’ facíase ecu “d'una recoyida de firmes n'Uviéu en favor d'una supuesta 'libertad lingüística' de colectivos vinculaos a la estrema derecha y que dicíen defender el derechu a vivir en castellanu nos territorios billingües”. Nesi sen, el coleutivu cívicu apunta que nun quier “marcar la escaleta de los sos informativos, pero nun tar presente na rueda de prensa d'una institución cultural –y pública– de tanta importancia como ye l'Academia y sí tar informando sobre los actos d'una organización ultraderechista como Hablemos Español marca mui bien la llinia ideolóxica que ta siguiendo la cadena baxo'l mandu d'Antonio Virgili”.

Esta situación nun ye aneudótica, yá que “‘TPA Noticias’ ye portavoz de les polémiques ficticies que promueven les fuercies conservadores asturianes –encabezaes pol PP y un conocíu diariu uviedín– contra'l procesu democráticu, dialogáu y consensuáu de recuperación de la toponimia tradicional. Les cámares y micros de la televisión pública siempre van tar ehí pa dar voz a los contrarios a esti procesu –que nun fai otro que cumplir cola llei–. Y amás fáenlo siempre d'una forma parcial, partidista, chocando colo que tien que ser la información veraz d'una televisión pública”, aseguren dende la XDLA.

Toponimia y diglosia

Amás d’esta denuncia pública fecha’l pol coleutivu pol tratamientu a l’actualidá sobre temes llingüísticos, recuerda tamién l’incumplimientu sistemáticu de la toponimia oficial, l’asturiana en 59 de los 78 conceyos asturianos, “tanto nos informativos como nos programes d'entretemientu”. Esta situación dase tanto na RPA, “onde la toponimia oficial –y la mesma llingua– nin existe” como na televisión onde nes nueves anuncies pa la publicidá “apaecen topónimos como 'Pajares' o 'Huerna', dalgo que supón un ataque frontal al procesu de recuperación de la toponimia tradicional”.

“Y, en metá de too esto, una programación d'entretenimientu qu'agora, amás de curtia, ye diglósica; onde nos vienden como espacios n'asturianu programes con presentadores que nun conocen nin la llingua nin les sos normes ortográfiques y onde los grupos más dinámicos de la escena sonora asturiana nun apaecen, mentes una y otra vez se repiten les mesmes voces ensin nengún criteriu nin calidá. Mentanto, na radio la música asturiana nun existe en nengún programa, dalgo que ye a les clares un actu de censura”, recuerda’l coleutivu cívicu, que considera que too ello tien un “fin claru: mostrar que l'asturianu ye una chancia, que nun ye una llingua de cultura que val pa falar de too”.

Na semeya, Marta Mori, Xosé Antón González Riaño y Xosé Ramón Iglesias Cueva na rueda de prensa de l'ALLA qu'acaparó l'interés de los principales medios de comunicación con presencia n'Asturies, cola esceición de la TPA.