L’ALLA afirma que la inversión adicional pola oficialidá nun superaría’l 0,35 por cientu del presupuestu d’Asturies

La campaña “escontra la llingua y cultura asturianes que xurde de sectores marxinales y minoritarios, pero con una innegable incidencia nos medios”, llevó a l’Academia de la Llingua Asturiana (ALLA) a retrucar les informaciones y datos falsos que se tán difundiendo. Ún d’ellos ye la inversión que supondría la cooficialidá.

"El procesu de puesta en práutica de la oficialidá n'Asturies sedría'l más cenciellu y el menos costosu, falando en términos económicos, de tol Estáu, darréu les carauterístiques específiques d'Asturies: comunidá uniprovincial (un solu parllamentu y ensin diputaciones provinciales), 1 millón d'habitantes, namás una universidá, 78 conceyos y presencia de mancomuinidaes, etc.", afirmó'l presidente de la institución académica, Xosé Antón González Riaño, nun actu énte la prensa nel que tuvo acompañáu pola vicepresidenta Marta Mori y pol secretariu Xosé Ramón Iglesias Cueva, y que contó tamién cola presencia de dellos académicos, ente ellos la ex presidenta Ana María Cano, y representantes de la Xunta pola Defensa de la Llingua Asturiana, Iniciativa pol Asturianu y ‘Reciella. Families pol Asturianu’. Lloñe de les cifres que tán espublizándose en prensa, que lleguen hasta los 70 millones d’euros, la oficialidá que plantega l’ALLA taría nunos 20 millones d’euros.

“Hai que tener en cuenta una situación”, puntualiza González Riaño, “na situación llegal y xurídica actual tamién se necesita inversión y si descontamos lo que s’invierte nesti momentu, la cantidá adicional qu’habría que poner sería de 13.400.000 euros, que son xustamente’l 0,317 por cientu de los presupuestos del Principáu d’Asturies (4.225 millones). Ésta ye la realidá de lo que cuesta la oficialidá que nós queremos; la que quieren otros pueden ser 200, pero la que queremos nós ye ésta”. En definitiva, una inversión de 20 millones que nun significaría un costu adicional superior al 0,35 por cientu del presupuestu del país.

El presidente de la institución tamién quixo apuntar qu’esos 20 millones añales sería cuando la oficialidá “tuviera en plenu rendimientu, porque nes primeres fases, nun plazu de diez años, sería inviable esta aplicación a plenu rendimientu”, poniendo por exemplu la situación en Secundaria, onde nun habría profesoráu suficiente anguaño pa ello. Entrugáu pol estudiu que fixo David Rivas, que tamién asitiaba’l costu de la oficialidá sobre 20 millones, de les qu’ente 8 y 10 sería la inversión adicional que debería facer el Gobiernu al contar tamién coles perres que pondría l’Estáu, al igual qu’asocede col restu de llingües cooficiales, González Riaño señaló que “coincidimos” col mesmu.

“Hai que conseñar, amás, qu’acordies colos plantegamientos de los espertos, una parte importante d’esta inversión diba recuperase al traviés de la creación de puestos de trabayu estables nel sistema educativu, del empléu en grupos corporativos teunolóxicos, del afitamientu d’empreses editoriales y discográfiques, de la xeneración d’un turismu cultural y de calidá, etc.”, siguió’l tamién profesor de la Universidá d’Uviéu.

Siete puntos

El comunicáu que fixo públicu l’ALLA de la boca del so presidente afonda en siete puntos, siendo ún ésti de la inversión –“prefiero falar d’inversión que de gastu, porque parte de lo que s’invierte na oficialidá y cultura asturiana revierte na sociedá asturiana económicamente”–. Los restantes señalaben que la demanda de la cooficialidá ye mayoritaria, con namái un 18 por cientu de población en contra; que los la cuestionen son “los que se ponen al marxe de la Constitución y non los que sofitamos esta opción”; que la oficialidá “nun implica, de nengún mou, la imposición del so emplegu, sinón el derechu al so usu”; que la llingua asturiana ye un patrimoniu cultural de toos “al marxe d’ideoloxíes y opciones partidistes”; que “ye falso que col marcu xurídicu actual se garanticen los derechos llingüísticos n’Asturies”; y que la oficialidá nun tien que replicar otros modelos, sinón “afayase a la concreta situación sociolóxica d’Asturies”.

González Riaño venceya la situación que se ta dando y la difusión de manera consciente de notices falses por parte grupos minoritarios en redes sociales –“que son los propios usuarios de les mesmes, como tán faciendo, los que deben de respondeles; ehí nun debemos entrar”, aseguró a Asturies.com– a dos circunstancies: los resultaos de la III Encuesta Sociollingüística d’Asturies y les resoluciones del XXXII Congresu de la FSA-PSOE, onde s’aprobó una enmienda a favor de la oficialidá del asturianu. Sicasí, pese a estos ataques que se basen nuna supuesta falta de demanda social y un intentu d’imposición antidemocráticu d’una minoría, amás de la cuestión económica, considera que “hai una mayoría social y política qu’ufre les máximes garantíes d’éxitu nel llogru d’esta demanda hestórica”.

Postura del PP

Sobre la postura del Partido Popular (PP) contra l’asturianu, el profesor universitariu confesó que “sí nos preocupa la so posición, porque camentamos que ye una posición equivocada”. “Munchos militantes del Partido Popular dícennos que nun comparten esa estratexa; ye más, hai conceyales y otros dirixentes que dicen que tampoco la comparte. Ye una estratexa que pretende dalguna clas de rentabilidá política, pero la socioloxía nun diz que d’ehí se pueda derivirar rentabilidá política”, añadió.

Dende l’ALLA, apuntó, lleven dos años tratando d’aconceyar cola líder popular Mercedes Fernández “pa compartir, o confrontar, o esponer…, como vemos nosotros la cuestión llingüística y la puesta en marcha de la cooficialidá, ensin resultáu”. Una reunión que, sicasí, espera poder llegar a celebrar.

Na semeya, Mori, González Riaño y Iglesias Cueva.