Paco Álvarez y Veiga reciben esti vienres los XVII Premios de la Crítica

L’Asociación d’Escritores d’Asturies entrega esti vienres n’Uviéu los XVII Premios de la Crítica y el XII Premiu de les Lletres d’Asturies. El ganador na estaya de novela n’asturianu foi Francisco ‘Paco’ Álvarez, mentes que na de poesía resultó gallardonáu Elías Veiga.

La esitosa ‘Lluvia d’agostu’ (Hoja de Lata), que se tornó tamién al castellanu, foi escoyida meyor novela del añu 2016. El xuráu conformáu por Mirta Chamorro, Vicente García Oliva –ganador de la edición pasada con ‘La vida de siempre’– y Xosé Ramón Iglesias Cueva, con José Marcelino García Fernández-Luanco como secretariu, decidió por unanimidá conceder esti premiu a la obra d’Álvarez sobre la vida del anarquista José Buenaventura Durruti, destacando d’ella la presencia “de dellos xéneros lliterarios ( biografía, novela negra, historia, llirismu…), toos ellos maxistralmente trataos y mui bien documentaos, lo que faen de ‘Lluvia d’agostu’ una novela enllena d’intensidá personal”.

Na estaya de poesía n’asturianu, tamién por unanimidá, resultó ganadora ‘La casa’ (Trabe), de Veiga. Lourdes Álvarez Fernández, Isabel Marina Valdés y Xuan Xosé Sánchez Vicente –vencedor na edición pasada con ‘De les hores y les memories’–, con Agustín Alonso Biscayar como secretariu, decidiéronse por esti poemariu pola so “homoxeneidá”, obra “onde’l ritmu serenu y pasáu dibuxa recuerdos infantiles, creando un retratu nostálxicu d’una vida rural llonxana, y por “crear nos sos poemes una historia reconocible y cercana, y facer ver con ellos una verdadera etnografía de sentimientos”.

El premiu en poesía en castellanu quedo ermu nesta ocasión, mentes que la meyor novela na llingua de Cervantes foi ‘El ojo vago’ (Pez de Plata), la primera nesti idioma de Xandru Fernández, escritor reconocíu pola so obra n'asturianu. Otra manera, el XII Premiu de les Lletres d’Asturies ye, a títulu póstumu, pa Mariano Arias Páramo, doctor en Filosofía, ensayista, novelista y fotógrafu fináu en mayu, del que se valora “la calidá de la so obra estensa y profunda, compuesta por numberoses y varies espublizaciones”.

La gala d’entrega de los gallardones va celebrase esti vienres, a les 19.30 hores, nel Aula Magna de la Universidá d’Uviéu, con entrada llibre. L’oxetivu d’estos premios ye “reconocer y  dar visibilidá a la lliteratura que se fai n’Asturies en castellanu y n’asturianu”, apunten dende l’asociación qu’engloba a los escritores del país y qu'esti añu nun entamó'l Premiu a la Meyor Columna Periodística.

Na semeya, un momentu de la gala de la edición anterior de los premios.