"Vamos ganar el campeonatu", anima Fernandi na gala de los XXXIII Andrés Solar

"Somos un equipu que yá gana partíos, mete goles y fai que los otros marquen goles en contra", apuntó'l comentarista de RTPA tres la entrega de los cuatro 'pegollos'.

El periodista Naciu Varillas encargóse un añu más de presentar los Premios Andrés Solar, y foi llamando, tres la llectura de les actes del xuráu de la trentena tercera edición de los mesmos por parte de Yolanda Huergo, ún por ún a los gallardonaos. Lali Solar, hermana del escritor de Deva, entregó’l primer de los cuatro 'pegollos' d'esti añu a los representantes del Stiaua d’Asturies, club del grupu 2 de la Segunda Autonómica, Pedro Arias y César Huerta. “Ye un arguyu pa nós recibir esti premiu”, apuntó Huerta, que confirmó que dende’l club “vamos siguir cola defensa de la nuesa llingua y la nuesa cultura”.

Pol Llosalín, club de fútbol femenín que compite na Lliga Autonómica, xubió al escenario Sandra Fernández Gavela, que comentó cómo dende los sos inicios el club que preside emplegó l’asturianu en redes sociales “por normalizar, dalgo que nos paez importante”. “Nun queda otra que puxar pol asturianu, porque ta perdiéndose”, apuntó depués de rellatar como’l so fíu falaba asturianu “hasta los 3 años” y foi con 4 a la escuela.

La mayor representación foi la del Rosal, cola presencia de Hugo Córdoba, Carlos Suárez, Pepe Rodríguez y Iyán González Castro, que foi’l que tomó la pallabra. Tres repasar la historia reciente de la entidá, a piques del desaniciu la temporada pasada, na que finalmente algamó l’ascensu a Primera Autonómica, señaló que “la única manera de plantegar un club de fútbol popular n’Uvieú ye emplegando con normalidá la llingua na que falamos xugadores, téunicos y aficionaos”.

L’equipu con más estructura y socios (alredor de 400) de los cuatro gallardonaos, l’UC Ceares, foi l’últimu en xubir a recoyer el Pegollu. Borja González Cantora y Vítor Xuan Melero encargáronse de representar al club xixonés de Tercera División, con munchos aficionaos ente’l públicu. “Vamos siguir trabayando en facer normal l’usu del asturianu”, aseguró’l segundu, qu’espera qu’esti llabor sirva pa que “cada vegada sían más los clubes de fútbol llibre que falen na nuesa lingua”.

Audiencies en función del interés del partíu

La Xunta pola Defensa de la Llingua Asturiana (XDLA) convidó a Miguel Fernandi ‘Burilo’, comentarista deportivu de RTPA y voz habitual de les retresmisiones de fútbol n’asturianu na televisión pública, con Nacio González nos comentarios, a participar nun eventu nel que’l balón yera protagonista. “En 40 años nun algamemos l’oxetivu que nos marquemos, pero tamién festexamos llogros: a día de güei nadie con dos deos de frente pue dicir que l’asturianu nun ye una llingua y l’idioma tien presencia en tolos ámbitos, anque en dalgunos cueste más que n’otros”, comenzó’l de Lluanco.

El fútbol ye ún de los espacios onde l’asturianu ta entrando con fuercia “dende abaxo hacia arriba, como siempre”, siguió. Asina, citó l’exemplu de los cuatro premiaos, el cambiu de nome na década pasada de L’Entregu o l’usu que comiencen a facer del idioma el Condal, l’UP Langreo y el CD Tuilla, pa depués facer referencia a los xestos fechos pol Uviéu, como la torna de la web al asturianu.

“El papel de los medios ye fundamental”, añadió, pa destacar darréu que “pue paecer poco, pero les audiencias van en función del interés del partíu” y non de que se retresmita nun idioma u otru, “síntoma de normalidá”. “Nun pasa nada si se fai n’asturianu, como nun va pasar nada’l día depués de la oficialidá. Somos un equipu que gana partíos, mete goles y fai que los otros marquen goles en contra. Vamos ganar el campeonatu”, finó.

El discursu del voceru nacional de la XDLA, Carlos Pulgar, y l’actuación d’Ún de Grao completaron la gala d’entrega de los premios n’alcordanza a Andrés Solar, que terminó con un pinchéu con sidra de mesa y vinu de Cangas nel propiu Centru de Cultura Antiguu Institutu.

Na semeya, los premiaos col 'Pegollu'.