La xestión de los casos de contaminación lleva a la Xunta Xeneral a reprobar a Belén Fernández

La propuesta de reprobación a la conseyera d’Infraestructures, Ordenación del Territoriu y Mediu Ambiente, Belén Fernández González, presentada por Podemos salió alantre col apoyu de tolos partíos menos la FSA-PSOE. La oposición critica la so xestión de los casos de contaminación recientes, como'l d'Avilés.

Nun sentó bien nes files socialistes esta reprobación, la tercera que se presentaba contra la conseyera y la primera que salió alantre. Sobre manera, la FSA-PSOE cargó contra la postura d’Izquierda Xunida (IX), formación qu’acordara un alcuerdu d’investidura pa que Javier Fernández algamara la presidencia del país y que en gran parte de la llexislatura foi’l so apoyu na Cámara.

Héctor Piernavieja, diputáu de Podemos,  reprochó la “falta de capacidá” de Fernández González, y criticó la so xestión de los casos de contaminación reciente, siendo’l más nomáu la fuga de SO3 de la planta d’ácidu sulfúricu de la factoría d’ArcelorMittal n’Avilés. Ésta ye la segunda reprobación que fai’l Parllamentu asturianu esti añu, depués de la que tuvo llugar en marzu a María Jesús Álvarez González, conseyera de Desarrollu Rural y Recursos Naturales, nesa ocasión presentada pol PP.