Asturies.com participa como convidáu nun alcuentru ecoblogueru con sede en Barakaldo

EQUO Euskadi entama esti sábadu esta xornada na qu'Asturies.com va esponer la esperiencia d'abrir camín pa una llingua minoritaria al traviés de la rede.

Fernando de la Fuente, direutor d'esti diariu dixital, va participar pela tarde (16.30 hores) nuna sesión moderada por Carmen Muñoz, vocera del grupu municipal d'Udalberri nel Bilboko Udala, y na que tamién van contar la so esperiencia Mónica de la Parte, de la revista cántabra 'Green.Eco'; Roberto Ruiz Robles, presidente de l'Asociación de Ciencias Ambientales; y Christina Werckmeister, redautora del blogue feminista '12 Miradas'. Los cuatro van contar 'Experiencias de éxito', tando entitulada la charra que va protagonizar Asturies.com como 'La experiencia de abrir camino para una lengua minoritaria a través de la red. 20 años de supervivencia'.

Tres les intervenciones, va abrise una alderique ente los cuatro convidaos sobre si '¿Se puede/debe usar la red para hacer política?' o '¿Cómo llegar a la juventud?', pa zarrar la xornada coles entrugues del públicu. Ésta, baxo'l nome de 'Encuentro Ecobloguero', va comenzar a les 11.30 hores con unos talleres de formación a cargu de Chris Miller.

Toles actividaes, nes que participen militantes d'EQUO Asturies, van desendolcase nel BIC Bizkaia Ezkerraldea de Barakaldo y tienen como oxetivu "facer una actividá de formación y alderique al rodiu al usu de la rede como mediu de comunicación de l'aición y les idees polítiques".