Un 'gol d'oru' condena al Hostelcur na final de Copa de Lloret de Mar

Les xixoneses perdieron el so primer partíu de la temporada énte l'esixente CP Voltregà.

Nun tuvo fortuna l'Hostelcur Xixón, que vio como en delles ocasiones la pelota golpiaba nos palos de la portería defendida por Laia Vives, na final de la Copa de ḥoquei patinos femenín tres completar unos cuartos de final y semifinales inmaculaos: trunfu por 3-0 énte Las Rozas y pol mesmu resultáu col Manlleu, de manera respeutiva. El potente conxuntu catalán, actual campeón de la OK Lliga que contó cola ventaya de xugar cerca de casa, plantó cara a les de María Fernández Grande 'Pulgui' y consiguió lo que naide fixo en tola temporada: derrotales.

Pa ello tuvieron que llegar a la prórroga tres finar el tiempu regular con empate a 2 goles. Adriana Gutiérrez Valero destacó como meyor xugadora de la final y foi la autora del tantu qu'abría'l marcador, el que ponía la igualada nel minutu 22 tres la remontada del Hostelcur y el gol d'oru a dos minutos y mediu pal final de la prórroga. Trés dianes de l'arxentina nuna actuación estelar que daba'l títulu de Copa a les catalanes, el sestu de la so historia.

Lliga y Copa d'Europa

Los caprichos del calendariu faen qu'esti mesmu sábadu, a les 18 hores, los dos finalistes de Copa tornen a vese a les cares, nesta ocasión en Lliga. L'Hostelcur encabeza la clasificación con 45 puntos, unu más que'l Club Patí Voltregà, segundu clasificáu, anque con un partíu más disputáu poles catalanes.

Dambos conxuntos tamién podríen cruciase n'otra final la selmana siguiente, cuando en Xixón va disputase la Copa d'Europa. L'Hostelcur va disputar les semifinales contra'l Benfica, mentes que'l Voltregà va xugar col Manlleu.