El Muséu de Belles Artes recibe una donación de 29 obres de la coleición de Plácido Arango

La Xunta de Gobiernu del Muséu de Belles Artes d’Asturies decidió aceptar la donación del empresariu mexicanu de raigañu asturianu Plácido Arango de 29 obres maestres de la so coleición pictórica y escultórica. La instalación uviedina va recibir trabayos d’artistes españoles fechos ente'l 1485 y el 1992.

En total son 28 los pintores y escultores que firmen estes obres, 18 d’ellos inéditos nel Muséu del Belles Artes. Asina, la llista ta compuesta por Diego de la Cruz, cola creación más antigua, ‘Tabla del nacimientu de la Virgen (Tabla de Adanero)’; Juan Correa de Vivar, con dos pintures; Luis de Morales ‘El Divino’; Juan de Juanes; Juan Pantoja de la Cruz; Rodrigo de Villandrona; Juan Van der Hamen y León; Alejandro de Loarte; Francisco de Zurbarán; Jerónimo Jacinto Espinosa; Juan de Valdés Leal; Claudio Coello; Genaro Pérez Villaamil; Ignacio Zuloaga; José Gutiérrez Solana; Esteban Vicente; Pablo Palazuelo; Antoni Tàpies; Manuel Millares; Josep Guinovart; Rafael Canogar; Equipo Crónica (Rafael Solbes y Manolo Valdés); Eduardo Arroyo; Darío Villalba; Juan Muñoz; y Cristina Iglesias. A ellos hai que sumar quiciabes la pieza más espectacular, el ‘Retablo de la Flagelación de Leonor de Velasco’, del siglo XV, obra d’un pintor del entornu del Maestro de la Visitación y Maestro de Oña.

Tolos trabayos formen parte de la coleición d’ arte antiguo y moderno d’Arango (Tampico, 1931), propietariu de la conocida cadena de restoranes-tiendes VIPS, que vieno recuperando nos años últimos d’otros coleicionistes de fuera del Estáu. La donación ta dedicada a la memoria de los sos padres, Jerónimo Arango Díaz y María Luisa Arias Fernández, d’orixe asturianu y, con motivu de la mesma, y a mou de presentación de les obres, va entamase una esposición especial nel Belles Artes ente la primavera y la seronda d’esti añu.

Amás, ta previsto la edición d’un catálogu y la celebración d’un ciclu de conferencies y actividaes didáutiques. El conseyeru d’Educación y Cultura, Genaro Alonso, dao’l xestu d’Arango, propunxo güei nomalu Patronu d’Honor del Belles Artes.

Aumenta unos fondos yá importantes

Con esta donación, el Muséu de Belles Artes amplía los sos yá importantes fondos, desconocíos por gran parte de la sociedá asturiana hasta hai bien poco, pero formaos por obres maestres de los grandes pintores y escultores del artes asturianu y español, que se potencien tamién gracies a la reciente ampliación de les sos instalaciones.

Na semeya, el ‘Retablo de la Flagelación de Leonor de Velasco’.