Les obres donaes por Arango al Belles Artes, espuestes al públicu

|
'El Infante P. Bustos de Lara', de Francisco de Zurbarán

Dende’l vienres y hasta’l 22 de xunetu van tar espuestes les pintures y escultures donaes pol empresariu mexicanu d'orixe asturianu Plácido Arango al Muséu de Belles Artes d’Asturies. En total van poder contemplase 33 obres d’artistes españoles del sieglu XV hasta’l XX.

La inauguración va tener llugar estar tarde, a les 19 hores, actu nel que van tar presentes el presidente Javier Fernández; el conseyeru d’Educación y Cultura, Genaro Alonso; el viceconseyeru Vicente Domínguez; y la direutora xeneral de Patrimoniu Cultural, Otilia Requejo, ente otres autoridaes, y propiu Arango. Na esposición van poder disfrutar de les 29 obres anunciaes pol empresariu nun primer momentu y otres cuatro que sumó posteriormente, destacando les trés tables del pintor Juan de la Abadía: ‘La Virgen, el Niño y Santa Ana’, ‘San Pedro entronizado con dos cardenales’ y ‘San Miguel y Santa Engracia’.

Esta donación permite ampliar la llista d’artistes que tienen presencia nel Belles Artes en 18 nomes, ente los que destaquen Diego de la Cruz, Juan de Juanes, Juan Pantoja de la Cruz, Bartolomé González, Juan van der Hamen, Jerónimo Jacinto Espinosa, Juan de Valdés Leal, Antoni Tàpies, Manuel Millares y Eduardo Arroyo, o autores contemporáneos como Juan Muñoz y Cristina Iglesias. Mentes, tamién suma obres de Juan Correa de Vivar, Luis de Morales, Francisco de Zurbarán, Genaro Pérez Villaamil, Ignacio Zuloaga y José Gutiérrez Solana, ente otros.

La mayor parte de les creaciones van exhibise na totalidá de la planta baxa del Palacio de Velarde, reservándose l’adriu del edificiu de l’ampliación pa instalar el ‘Retablo de la Flagelación’, del sieglu XVI, obra d’un pintor del entornu del Maestro de la Visitación y Maestro de Oña. Mentes, les pieces monumentales de Rafael Canogar, Josep Guinovart y Darío Villalba intégrense nes sales dedicaes al arte contemporaneu español de la planta segunda de la parte ampliada.

Esta amuesa va tar abierta al públicu dende mañana a les 10.30 hores hasta’l 22 de xunetu. La visita al Muséu de Belles Artes d’Asturies ye de baldre de martes a domingu, tando los llunes la instalación pesllada.

Conferencies

De manera paralela a la esposición, van entamase delles conferencies al rodiu de la mesma. La primera, el 15 de febreru a les 19 hores, va tar protagonizada por Leticia Ruiz Gómez, xefa del Departamento de Pintura Española del Renacimiento del Museo Nacional del Prado, que va falar sobre les seis pieces del sieglu XVI de la coleición Arango catalogaes por ella: dos de Correa de Vivar y una de De Morales, de De Juanes y de Pantoja de la Cruz, amás d’una atribución a Bartolomé González.

Na semeya, 'El Infante P. Bustos de Lara', de Zurbarán.

Contador Estadistiques