Cultura va usar drones pa documentar la situación de los 29 castros de la mariña catalogaos

El proyeutu ‘Castros marítimos asturianos a vista de dron (2017-2018). Les teunoloxíes nueves aplicaes a la investigación, conservación y difusión de los castros asturianos’ pretende documentar la situación de los 29 castros de la mariña catalogaos. Yá se fixeron delles pruebes nel de Punta’l Castiello.

La documentación d’esti conxuntu de castros coles teunoloxíes más modernes, el desarrollu d’una metodoloxía innovadora científico-téunica pal so estudiu y intervención, y la definición d’un protocolu de xestión integral d’estos espacios arqueolóxicos son los principales oxetivos d’esti proyeutu que combina investigación básica y aplicada. Los drones van emplegase principalmente na fase de documentación d’esti patrimoniu, n’ocasiones d’accesu difícil o imposible dada la so llocalización na mariña, l’aición erosiva del mar y los procesos asociaos a la mesma.

La precisión, inmediatez y versatilidá de les teunoloxíes nueves constitúin una ferramienta mui útil pa la xeneración d’una base documental de referencia d’estos xacimientos arqueolóxicos que facilitará la planificación, siguimientu, control y xestión de los mesmos, según apunten dende la Conseyería d’Educación y Cultura. En concreto, va emplegase la teunoloxía suiza Sensefly, cola que van algamase semeyes d’una calidá hasta agora inesistente nel estudiu d’esti tipu de patrimoniu cultural, amás de fotografíes verticales xeorreferenciaes, nubes de puntos en 3D y ortofotografíes xeorreferenciaes y midibles.

Nuna segunda fase, la documentación xenerada va ser analizada y interpretada con criterios xeoarqueolóxicos aplicando una metodoloxía innovadora d’investigación. Ésta foi desendolcada a partir de los trabayos fechos nos meses últimos pola Direición Xeneral de Patrimoniu Cultural y el Departamentu de Xeoloxía de la Universidá d’Uviéu en rellación con un xacimientu en particular, el castru de Punta’l Castiello un estudiu que sacó como conclusión destacada “la necesidá de definir un protocolu de xestión integral de los castros marítimos qu’implica a diferentes alministraciones y organismos na xestión d’estos espacios”.

Demanda d'una intervención urxente

El castru asitiáu en Podes ye un elementu del nuesu patrimoniu en peligru de desaniciu, polo que dellos coleutivos como la Lliga Celta d’Asturies y l’Asociación Cultural El Curbiru de Bañugues vienen demandando l’actuación urxente del Gobiernu pa dar una vuelta a esta situación.