El paisanu, el fueu y el llobu (III)

17 Mayu, 2016 por Pepín Fernández

Pepín Fernández's blog
Inicie sesión o rexístrese pa espublizar comentarios

Tenía compremetío escribir esti artículu y nun yera quien a poneme, porque nun sabía qué escribir. ¿Cómo falar del llobu n’Asturies sin entrar nun rueda de discusiones inútiles y sectaries?

Lo primero que tengo que dicir ye que nun vi un llubu en tola mio vida. Y nun tengo vaques, nin oveyes, nin cabres, asina que nunca me comieren los llobos nada. Cuando me metí en política nel añu 2012 lo único que sabía de los llobos yeren los cuentos del mio pá. De cuando allindiaba el ganáu, con 12 años, y los sentía pela nueche y les vaques alterábense toes.

Entós, si nun sé ná de llobos, ¿pa qué escribo de llobos? Bono, porque'l problema del llobu n’Asturies nun ye un problema del animal, ye un problema políticu y mediáticu. Y d'eso deprendí un pocu nestos cuatro años. Voi tratar de sentar unes idees básiques que mos permitan llegar a un resultáu.

El llobu ye un animal carnívoru. Como carne, d'animales que mata o d'animales qu'alcuentra muertos. Cuando caza si pue, mata más animales de los que pue comer pa volver al otru día a comelos. Nun mata porque sea dañín, mata porque ye'l so papel nel ecosistema.
Yo nun defendo al llobu, defendo l'ecosistema y la biodiversidá y el llobu ye una parte más. Tien el mesmu valor un llobu qu'un raposu, qu'un esculenciu o qu'una faya. El valor de la vida nun se pue midir pol númberu de 'Megusta' en Facebook. El llobu tien un gran valor pal equilibriu de les especies. Ye necesariu pa equilibrar les poblaciones de venaos, corcios, xabalinos y robecos. Val pa evitar que se propaguen enfermedaes neses especies y ayuden a desapaecer la carroña.
N’Asturies casi tol terrén ta ocupáu por actividaes humanes, como la ganadería; nun hai superficie que nun s'use y que valga como reserva pa la fauna montés. El sitiu más protexiú de toda Asturies, que ye'l Parque Nacional de Picos d'Europa, tien una gran carga ganadera. N’Asturies nos 25 años últimos perdiérense la metá de les ganaderíes, pero les qu'hai tienen el doble d'animales. Asina ye que según el SADEI, en 25 años el númberu de vaques baxó nun 2 por cientu; les cabres y les oveyes nun 10 por cientu; y les caballeríes nun apara de xubir el númberu. En total n’Asturies hai mediu millón de cabeces de ganáu.
Hai munchu intrusismu profesional na ganadería. Por eso hai animales que tán l’añu enteru en monte y qu'inclusive tienen que dir los guardies a buscalos y el amu nun apaez, como pasó va unos díes con unos caballos nel Sueve. Hai, poro, una parte d'esa ganadería que ta suelta al pascu, en monte públicu, iviernu y branu, en zones onde hai llobos.
Nel 30 por cientu de la superficie d'Asturies nun hai llobos. Si se ve dalgún llobu, los guardies de Mediu Ambiente mátenlos. N’Asturies nun se sabe los llobos qu'hai; digamos qu'hai más de 100 y menos de 300. Eso pa una superficie de 7.000 quilómetros cuadraos (10.000 menos el 30 por cientu). Tolos años muerren llobos, parte atropellaos nes carreteres, parte muertos pola conseyería (30 o 40 al añu nos últimos), por furtivismu y tamién nes monteríes llegales de xabalinos. Quier dicise, cada añu mátense sobre el 15 por cientu de los llobos qu'hai n’Asturies.

Si xuntamos toles idees anteriores, vemos que tenemos un problema. Tenemos ganáu sueltu nel monte, y tenemos unos bichos a los que-yos gusta comer carne. Asina que tenemos que los llobos maten ganáu. Nun lo maten sólo los díes que nun tienen otra cosa que poner en 'La Nueva España'. Tolos díes maten dalguna res.

¿Y agora qué facemos? ¿Echar la llingua a pacer y dicir qu'esto solucionolo yo, porque ye too culpa de los ecoloxistes ésos? ¿Mirar pa otru llau?

Supónse que'l racional ye'l paisanu, non el llobu. Si queremos impedir que'l llobu mate'l ganáu tendremos que ser les persones les que pensemos qu'hai que facer. Hai que cambiar el discursu. Nun ye qué se fai col llubu, ye cómo facemos pa garantizar la superviviencia económica de les caseríes que tán en zona de llobos.

Porque hai que quitar dramatismu a la situación. El llobu y la convivencia con espacios protexíos nun ye'l problema de la ganadería, yá lo dixi nel primer artículu; el problema ye d'estructura económica de la sociedá y de conformación de les caseríes. El llobu afeuta sólo a la ganadería estensiva y sólo a la que ta en zona de llobos. Ye un tema llocalizáu; nun ye xeneral como se quier facer ver. El númberu de ganaderíes que tienen perdes pol llubu ye de bastante menos de mil al añu y, en muchos casos, la perda ye d'un animal al añu, sobre un total de 80 o 100.

Tampoco nun se trata de falar de rentabilidaes a plazu curtiu. Les vaques nun son rentables, viven de subvenciones y una parte del ganáu que ta nel monte nun ye pa sacar perres, tienlo la xente pa entretenese. Tenemos que mirar les coses a plazu llargu. Romper los equilibrios de los ecosistemes tien unes consecuencies mui negatives pa les persones. La conservación de la biodiversidá nun ye un caprichu, ye la garantía de la nuesa supervivencia. Por tanto, tenemos que buscar soluciones pa la convivencia de l'actividá humana y la conservación de la naturaleza. Y digo soluciones, non solución, porque les coses pa faleces bien hai que pensales y trabayales, y da-yos tiempu.

Matar llobos pon en peligru la especie, cuesta perres y nun sirve pa nada, como se ta viendo añu tres añu. Entós, ¿qué? Como dicía al entamu del artículu, ésti nun ye un problema científicu nin social; ye políticu. La mio esperiencia nestos cuatro años ye que les noticies qu'apaecen nos medios sobre'l tema y les protestes que se sienten tienen un interés polítcu y non realmente corporativu. Ye más, creo que los intereses de la caza escuéndense munches veces tres estes polémiques.

Por eso, creo que ye la hora de que les alministraciones tengan una política propia que nun dependa de les noticies del periódicu, sinón de criterios sólidos y coherentes. Ye hora de probar otres coses. Si en Castiella lleven matando llobos 10 años y tan tol día quexándose, igual ye qu'esi nun ye'l camín; igual ye qu'hai que probar otres coses. Y pongo exemplos:

Munches de les muertes que s'atribuyen al llobu causenles perros descontrolaos. Nun se sabe cuántos de esos ataques son de perros, pero hailos que piensen que pueden ser hasta’l 20 por cientu. Por eso hai que facer análisis de les reses muertes pa saber si tienen saliva de llobu o de perru, o nun la tienen. Eso da seguridá al ganaderu que reclama, porque va tener una prueba física de que'l llobu comió del so animal y permitiría que tuviéremos una certeza de la cantidá de reses muertes pol llubu. Cuando supiésemos que nun sitiu'l ganau lu ta matando un perru, habrá que facer un siguimientu y garrar esi perru. Los perros tienen amu y l'amu ha de ser responsable. Ye una cosa que'l mundu rural asturianu tien que deprender. La llei tien que cumplise nos pueblos. Tolos perros tienen que tener chip y l'amu ser responsable del so cuidáu.
Los pagos poles reses muertes tienen que cubrir tamién el trabayu perdíu, non sólo'l valor de la res, y tienen que pagase nun tiempu razonable colos menos trámites posibles. Y, si non, pagar intereses de demora. El llobu y el monte son públicos y los beneficios de la diversidá son de tol mundu. Poro, tola sociedá tien que pagar el so coste y non sólo'l ganaderu.
Hai que revisar dalguna de les actividaes ganaderes que más perdes tienen. Nun se pue tener un caballu l'añu enteru en monte namás que por diversión, inclusive que llegue a morrer de fame nuna nevada. Tener animales trai consigo una responsabilidá nel so cuidáu. El númberu de vaques qu'hai n'Asturies ye diez veces el del ganáu caballar; el númberu de daños na cabana ganadera bovina ye paecíu al de la cabaña ganadera equina. Eso quier dicir que daqué ta faciéndose mal. Y hai que revisalo. Caún na so casa pue facer lo que quiera, pero nel monte públicu tien que tar suxetu a unes normes.
En determinaos sitios y con determinaes actividaes, sería bueno probar con un pagu preventivu. Yá sé que nun ye rentable pastoriar un rebañu oveyes o de cabres como se facía enantes, pero si tamos nuna zona de muncha incidencia del llobu, onde hai rutes de senderismu que nun permitan l’usu de mastines, ¿podría contemplase una subvención pal pastoréu d'esos rebaños? ¿Podría estudiase la formación de cooperatives de pastoréu, que recuerden la tradición de considerar el trabayu de allindiar la reciella casique como un trabayu comunal? Ensin olvidase que'l tar llindiando caltién les mayaes, ensin desbroces y ensin quemes.

Tamos falando de perres, sí, nun lo voi negar. El cercáu de Balmonte pa los llobos costó un millón de euros de fondos mineros. L'hospital de la fauna de Sobrescobiu, 4,5 millones y ta vacíu. ¿Cuántes perres gastamos en promocionar el paraísu natural que tamos desfaciendo? ¿Cuántes en batíes de llobos? Les propuestes que fago equí son barates y eficaces, y dan emplegu n’Asturies.

Tenemos un problema, más políticu y mediáticu que real, pero un problema. Vamos entós a probar soluciones nueves; les vieyes nun son soluciones y nun funcionen.

Pepín Fernández ye inxenieru téunicu y trabaya nuna empresa de telecomunicaciones. Ye del Altu Nalón y vive en Xixón. Ye afiliáu d’EQUO Asturies y foi miembru de la Mesa de Coordinación y responsable de Comunicación hasta’l pasáu 12 de payares.

Comentarios

casín wrote on 26 Mayu, 2016:

Diz que nun sabía cómo entamar l’artículu. Yo tengolo bien claru, entámalu pa da-yos voz a los vecinos de los pueblos d’Asturies, los que vivimos nel monte tou l’añu.

Yo nun ví un llobu, 4 vecinos míos sí, y nun tengo nengún interés. Ví pisaés, cagaes, pelos nes allambreres, etc. y lo peor ya ví munchos animales domésticos muertos.

Esto nun ye un problema políticu y mediáticu, ye un problema de esa xente que ve el so trabayu tiráu a la basura, ye un problema de esa xente que nun puede pagar les coses pa la escuela los sos rapaces, ye un problema, un problema de verdá. Yo nun lo deprendí en política, deprendilo viviendo y falando con esa xente. Yo nun voi tratar de sentar unes idees, nun voi falar del papel del llobu n’un supuestu ecosistema nel que tamos viviendo xente y animales domésticos y que tenemos los mesmos derechos a siguir viviendo y trabayando como usté, nun voi falar de como’l llobu ayuda a desapaecer la carroña faciendo lo mesmu col ganáu sin poder cobrar nin indemnizaciones nin entrar n’estadístiques, nun voi falar de cómo van perdíes más de 8.000 ganaderíes n’Asturies (colo que supón pa una rexón esa pérdida de trabayadores) mientres se yos obliga a los que queden a ganaderíes más grandes pa compensar les pérdides, nun voi falar del intrusismu nel trabayu ganaderu y menos agora onde la xente tien que buscar alternatives pa llegar a finar el mes, nun voi falar de los caballos de El Sueve prindaos y subastaos como toa la vida se fecio nos pueblos mientres la xestión los guardies ye la de les cabres de Cabrales (y menos nun sitiu ensín llobos, digo polo de mézclalo tou) y nun voi falar de esa “mínima” población llobera que supón el 15% del estáu pa un 2% la superficie.

Y sí, xuntando tou eso tenemos un problema. Tenemos ganáu sueltu pel monte, que llocura, eses coses modernes de vaques n’Asturies ¿ónde vamos llegar? Publíquenlo nos medios de comunicación ¿qué pasa que nun quier que se publique? miyor que nun se vea los más de 3000 animales domésticos que maten los llobos nos nuestros pueblos. Ye mui prestosu esta izquierda que “llucha” po les sos idees pidiendo que los medios nun publiquen.

¿Y agora que facemos? ¿ye too culpa de los ecoloxistes? Güenu, ye lo que tien lluchar más polos llobos que pola xente, que vos defendan los llobos.

Ponse a buscar soluciones ¿qué facemos coles caseríes que tan en zones de llobos? Claru ho, porque los llobos tienen que tar nos nuestros pueblos, hai que dixebrar los llobos a los pueblos a los otros hai que dexavos vivir, ya que nun propón destruyir el so Xixón pa dexayos sitiu a los llobos, nun eso non, eso nos pueblos d’otra xente.

Hai que quitar dramatismu diz, mire, cuando vaya un llobu y mate un animal que usté crió con tou el cariñu y sudor dizmi si y quita dramatismu. Cómu si y va quitar dramatismu si tan destruyendo una forma de vida.

Diz que’l tema afeta na más a la ganadería estensiva, taría güenu, que tuvieren los llobos entrando nes cuadres intensives (tou se verá, porque naide diría va diez años que tarín pasiando pelos pueblos). Y eso sí ye un problema xeneral, porque afeta a toos los ganaderos de montaña, que tienen el mesmu derechu que los ganaderos de vaques pintes o que cualquier otru trabayador a ser respetaos pola so llabor.

NUN SÉ COMO PUE TENER LA POCA VERGÜENZA NEL MESMU PÁRRAFU DICIR QUE YE UN TEMA LLOCALIZÁU Y DEPUÉS DAR UNOS DATOS MEZCLANDO TOU ASTURIES, ¿NUN YERA UN TEMA LLOCALIZÁU? ¿ENTÓS POR QUÉ PA LA ESTADÍSTICA DE UNOS “POQUÍSIMOS” ANIMALES MUERTOS METEMOS TOU ASTURIES? Resulta que nun ye un tema xeneral, eso sí, pa facer una “estadística” y que los numberos y cuadren entós metemos a facelo con vaques pintes, culones, trashumantes a Estremadura, etc. Metemos hasta el vecín si la muyer y pon los cuernos con tal de que salga un númberu que quede guapu pa lo que quier dicir.

Tener vaques ye rentable pero facen falta munches condiciones na sociedá, entamando per xente como usté nun cumple. La conciencia del ganáu y comerciu sostenible, la importancia territorial de la actividá, etc.

Diz que romper los “ecosistemes” tien consecuencies mui negatives, y ye verdá, porque eso ye lo se lleva faciendo nos montes asturianos dende fai munchu. Equí ya había un ecosistema ya infinidá de plantes y animales monteses vivín gracies a la simbiosis colos paisanos de los pueblos, y esi ecosistema nun tenía los llobos pasiando pelos pueblos. Esi ecosistema rompiose cuando se entamaren a facer “parques” onde ún de los elementos, la xente, dexó de importar.

¿Si tan mal lo facién los paisanos de pueblu por qué tamos tan preocupaos por Los Picos, por Ponga, por Redes, etc? ¿Si esa xente nun fecio más que destruir por qué esos sitios tan protexios? Habrá que protexer Aboñu por exemplu, ehí nun hai ganadería estensiva.

Estallami l’alma lleendo que nun ye un problema social. Sí que lo ye, lo que pasa que nun ye la so sociedá la que tiene el problema, ye la sociedá rural de la que usté y munchos se dixebraren depués de que los sos pás y güelos colaren de los pueblos polo duru que yera el trabayu pa vinir agora como pioyos resucitaos a enterrar esa forma de vida.

Les protestes nun tienen color políticu, son los ganaderos y la xente los pueblos en xeneral los que protestamos, y seremos una minoría social, pero nun van a pisanos, porque al final queden los que más sienten esa tierra.

Tan per guapes les propuestes ñueves, discúlpeme pero son babayaes del que nunca crió un animal col so sudor:

1.- Ñegar que son los llobos los que maten, son perros descontrolaos. ¿Perros? ¿Úlos? Sábese bien si son llobos o son perros nun hai más que ver los restos que s’alcuentren. Y más, usté piensa que un vecín va a tener un perru pa mata-y los animales al otru vecín, pero d’onde salío usté, si el perru el mio vecín mata animales vese cuande aporte a casa ensangretáu, nun fai falta ser guarda.

2.- La política les indemnizaciones pa usté. Si un ganaderu quixera les perres vendería l’animal, nun diba esperar alcontralu abiertu en canal pa que y den una miseria (falamos de céntimos por díi trabayáu) pa que llueu vengan los ecoloxistes, sí, los ecoloxistes (depués dicen que porque nun los quieren nos pueblos) y los denuncien por “enriquecimiento ilícito”, rezumba la pandereta Manín.

3.- Diz que hai munches más vaques que caballos y que los daños son paicios. Pero vamos a ver rapacín, diz que ye inxenieru asina que a ver: si tien (5+2i)+(3+i) eso da (8+3i), ye dicir suma la parte real cola real y la imaxinaria cola imaxinaria. Asina que si lo que ta nel monte ye lo real pue sumalo, lo que nun pue sumar ye lo imaxinariu colo real. Esto ye, les ciento veinte mil vaques pintes que hai n’Asturies nun pueden sumar pal monte pa usté disvirtuar los datos pa que salga lo que usté quiera. Y más, los montes son públicos, sí, de esos pueblos y parroquies que yá tenín unes normes que rexín esos pueblos y esos montes munchu antes de que los nuestros güelos fueren tan siquiera unos rapacinos.

4.- Nun hai pagos preventivos, nin mastines nin babayaes. Esto ye Asturies, una rexón minifundista, pindia, dura, etc. Y desapaició la reciella col grave problema que ye, y lo que propón y favorecen eses idees solu va a traer la desapaición de les vaques y caballos de monte porque la nuestra tierra ye muy particular y pa vivir nes nuestres xerres caliares y nes nuestres camperes facen falta unes característiques que poco animales domésticos tienen. Y sí facen falta quemes, pero quemes como les de antes, onde se protexía el suelu, el pueblu y los biescos gracies al fueu.

¿Propuestes eficaces? Mañana garra un rebañu cabres y va a poneles en práutica y yá mi cuenta lo práuticu que ye.

Nun ye un problema real, non, vaiga a dicilo al paisanu que alcuentra al so animal coles tripes fuera, un animal criáu por elli, con nome e historia, vaya y diga-y que eso que ta viendo nun ye real. Yo sí y digo, lo vieyu sí ye la solución, la preba ye que tuvo dómines furrulando, pero no vieyu los llobos nun paseaben pe los pueblos, por eso diz que nun ye la solución.

Pa finar, esmolezlu munchu que grupos de Facebook que falen de ganadería tenga dos, tres y hasta diez veces más siguidores que’l so partíu, pero, ¿sabe por qué ye? Porque ehí vese verdá, vese sentimientu, vese la llucha la xente, vese allegría cuando un animal sana, vese dolor cuando un llobu lu abre en canal, vese una forma de vida única y eso prestanos a la xente. Otros facen un escritu falando de convivir con “animalinos” como los llobos y depués van al Ayuntamientu d’Uviuéu y contraten una empresa pa escorrer los páxaros de los árboles. Eso ye lo que dixebra uno de l’otro.