La Generalitat Valenciana convida a Asturies a participar nun seminariu de direiciones de política llingüística

L'asturianu y l'aragonés participarán nel I Seminari de Direccions Generals de Política Lingüística xunto col restu de llingües oficiales del Estáu. La Generalitat Valenciana tramitó una invitación al Gobiernu pa tar presente nesti alcuentru nel que, ente otros asuntos, aldericaráse sobre l'impulsu d'una llei estatal de llingües propies.

Rubén Trenzano, direutor xeneral de Política Lingüística i Gestió del Multilingüisme, anunció esta convocatoria mientres la presentación del Arbre de les Llengües nel Centre del Carme de València, monumentu que simboliza los qu'utilicen los filólogos pa estructurar les families llingüístiques. Esti seminariu va celebrase'l 14 de mayu nesi mesmu llugar y el Gobiernu valencianu convidó a participar a los direutores de política llingüística de tolos territorios con llingua propia que cuenten con direición de política llingüística: Euskadi, Catalunya, Galicia, Asturies, Aragón, Navarra y Illes Balears.

La presencia de la llingua asturiana y l'aragonesa nesti conceyu ye bien importante, al frayar la dinámica de trabayu en bloque de los idiomes oficiales a la hora de defender aspeutos comunes. Y ye que l'oxetivu del Seminari de Direccions Generals de Política Lingüística ye'l d'intercambiar puntos de vista y propuestes sobre diversidá llingüística y sobre el papel qu'ha d'asumir l'Estáu cola realidá multillingüe, cola propuesta d'impulsar ente toes estes alministraciones una llei estatal de llingües propies.

"La Carta Europea de les Llingües Rexonales reprocha al Estáu español la dexadez por nun velar pola diversidá llingüística que tenemos. Ye por eso qu'una de les llinies de trabayu del seminariu va ser desendolcar un borrador de llei orgánica pa desplegar l'artículu 3 de la Constitución", afirmó Trenzano.

#PrimaveraEducativa

El I Seminari de Direccions Generals de Política Lingüística va desendolcase nel marcu de la #PrimaveraEducativa, actividá que va tener llugar en València mientres el mes de mayu dedicada al multillingüismu con más de 1.500 actividaes pa la promoción del valencianu y la participación de 500 centros escolares. Asina, va celebrase una Fira de les Llengües y habrá espacios pal cine o la poesía.

Na imaxe, Trenzano, segundu pela izquierda, mientres la presentación del Arbre de les Llengües.